Mah tluk mi rawi hi movie hmanh ah a um hnga dek maw. “Thor: Ragnarok” movie i Loki nih a upa Thor a rawimi te hna kha cu chim awktlak hmanh si lo. Ralkap dotu Dr. Ngun Cung Lian cu ralkap bawizik ruahnak petu asi cang.
Dr. Ngun Cung Lian cu ralkap dotu CNF ah hruaitu a rak si ve. Chinmi aiawh in CNF upa pawl he Naypyitaw ah ralkap le USDP cozah an rak ton i “tlangcungmi hi mah tein i uknak nawl kan pe uh … ” tiin an rak hal.
Nain, a rianṭuan hawi CNF le an aiawhmi Chin mipi cu a kan rawi i kan dohmi USDP + Ralkap sinah a lut diam.
Atu cu Chinmi le Myanmar mipi nih kan thimmi NLD cozah uknak a chuttu ralkap bawizik Min Aung Hlaing ruahnak petu asi cang.
CNF le Chin mipi rawi in Ralkap le USDP cozah (U Thein Sein cozah) sin a tlikmi kong cu 2018 le 2019 ah “U Thein Sein acozah he kai pehtlai lo, ram daihnak phu ah ka ṭuan .. cu e .. kha ee…” tiin Facebook ah aa rak pheh len i a mawhchiat tu pawl cu bia fakfak in a rak phomh len hna. Ralkap sin a luhmi zong hi aa pheh rih te men lai.
Chinmi le Kawlram mipi nih thih ngamh in ralkap an doh i cozah rianṭuan tampi zong rian an i phuak. Mah lio ah Chinmi chungin hi bantuk an um cu ngaihchia ngai asi.
Myanmar mipi nih thimmi cozah, phungninglo in uknak a chuttu le ram hrawktu, rammi vialte rawitu min cazin ah Chin kan i tel ve cu sia a rem lo ngai.
NLD nih 2008 phunghram remh an timhmi kongah ralkap tapeh Dr. Ngun Cung Lian nih “NLD an palh” tiin a rak mawhchiat hna lio video
Dr. Ngun Cung Lian hi U.S. citizen asi. “Mipi thimmi cozah uknak chuttu ah nai tel …” tiin US cozah nih citizenship a chut te hnga dek maw.
Kan hnu zarh ah ralkap bawi pawl cu US cozah nih US tlawn a phih hna i US um an chawva a kharpiak dih hna.
Dr. Ngun Cung Lian nih CNF le Chin mipi a kan rawi hlan ah bia a rak chimmi atang video ah zoh khawh asi – mi rawi hmang hi bia an thiam ngai.
