ONE Championship ah MMA aa ṭhuami Karen ngaknu Bozhena Antoniyar cu uknak firtu Myanmar ralkap doh dingin ramtang Karen hriamtlai phu sinah raltuk tinṭan a kai cuahmah lio si, tiah kan theih.
Kayah state ah chuakmi kum 25 ngaknu Antoniyar cu kum 16 asi lio tein boxing thongh a cawng cangmi si. Myanmar National Boxing ah voi 2 tiang champion a ngah.
ONE Championship ah avoi khatnak bik aa ṭhuat lio ah, a zuamcawhtu nu cu an i ṭhuat cangka in second 24 chungah tho kho loin a ṭhuat tei colh caah vawleipi cul in a minthangmi MMA zaanglek thiam asi.
Atu lio hi, Myanmar zaanglek thiam tampi cu uknak firtu ralkap kuttang ah ramdang ah zaanglek i zuam dingin timhtuahnak an ngei cuahmah hna.
Mipi thah, inn hrawhpiak le thilri chuh an ton cuahmah lio caan ahhin, mipi caah tuah a herhmi ralṭha tein tuah le doh a herh, tiah Antoniyar nih a chim.
“Myanmar ram aiawh in aa zuammi zaanglek thiam pawl zong, Zaanglek Zung ah rianṭuanmi zaanglek thiam pawl zong, zaanglek ah unau vialte hna, ralkap caah zaanglek tuah loin CDM tuah cio ulaw ka duh.
“Zei ruang ti ahcun, thisen le thlenti chuak in nan i zuam. Vawlei mi vialte hmai ah, Myanmar thantar i tlaih in Myanmar ka si ti nan langhter caah zeihmanh si lomi ralkap kut tang ah Myanmar nan aiawh ding ka duh lo.
“Mah ruang cun, ralkap kan aiawh duh lo tiin nan dihlak ralṭha tein le fianghlang tein bia chahnak tuah uh ti kan duh hna,” tiah Antoniyar nih a chim.
