MP hlun Pu Lal Maung Cung nih COVID-19 in a kan liam tak

,

MP hlun Pu Lal Maung Cung, kum 53 cu nizaan July 29 zaan 9:45pm ah COVID-19 zawtnak in Thantlang ah a nunnak liam.

Pu Lal Maung Cung cu kum 2010 in 2015 tiang Chin Ramkulh Hluttaw MP a rak ṭuan mi si.

Chin National Party ah Chairman a ṭuan lio mi zong a si.

Thantlang khua, Zunghmun sang ah khuasami asi.

Chin pasalṭha kan sung ṭhan.

Pu Lal Maung Cung

A nau hniangbik Salai Van Bawi Lian nih liamchia thla 1 hrawng ahkhan a liamtak cang hna.

Tantakmi chungkhar caah tuar a har taktak lai. Bawipa nih hnem ko hna seh.

Thantlang, Hakha, Falam le Chin state pumpi i ralrin taktak kan herh

Nai hrawng cu Thantlang, Hakha, Falam le Chin state hmun kip ah COVID-19 zawtnak a karh chin lengmang.

Atu lio cu Chin state ramri India le pawngkam ram pawl ah COVID-19 a karh tuk cio.

Hmasa COVID-19 kha minung tampi an i chawnh tikah duhsah tein aci aa thlengmang i atu lio a karh bikmi hi Delta Variant asi. Hmasa nakin let tampi in i chawnh le thih a fawi deuh. Cucaah hmasa nakin i ralrin deuh kan hau.

Cun, zawt hmelchunhnak a ngei lomi (Asymptomatic) pawl ruangah zawtnak a karh khun. An pum chungah COVID-19 hrik a um ko nain an zei hmanh ti lo caah zawtnak an ngeihmi an i hngalh lo. Tikah an daithlang i duhpaoh in an vak i minung tamtuk an chawnh hna.

Cucaah, ka dam ko tiin vah len ding asi lo. Na zeihmanh ti lo zongah na pum chungah COVID-19 hrik a rak um ziar kho. Midang na chawnh hna tikah an thi kho.

A herh tuk lo ahcun vak hrimhrim hlah usih. Mi inn ah len hrimhrim lo ding, mi zong i lenter bak lo ding. I ralrin lawngah COVID-19 in luat khawh asi. Kawlram cun raikhamsi chunh awk zong a um lo pinah zawt sual cun sii man vantawng bak asi caah ramdang um Laimi nakin a hlei in ralrin kan hau. Pathian nih kan huhpheng ko sawh seh.