February 1 ah Myanmar ralkap nih mipi uknak a chuh i ralkap cozah (State Administrative Council) a dirhmi cu hrawh i mipi sinah uknak kirter ṭhan dingin US cozah nih rian a ṭuan cuahmah.
Cu ah a biapimi pakhat cu US Hluttaw (Congress) biachahmi/resolution hna hi an si.
“US Congress ah Myanmar ralkap uknak hrawh dingin resolution 4 chuahpi asi cang i cu hna cu fonh i upadi ah ser khawh dingin forhfialnak kan tuah cuahmah lio asi,” tiah Salai Elaisa Vahnie nih a chim.
BACi Executive Director le Free Myanmar Campaign USA ruahnak petu a simi Salai Vahnie nih, “US Hluttaw ah an chuahpimi resolution pawl cu upadi ah ser dingin keimah pumpak hrimhrim nih MP (congressmen) pawl ka zohpi hna i Kawlram kong a biapi ddeuhmi policy zong telh dingin ka remhpiak hna,” tiah a chim.
Resolution sawhsawh lawng si loin US President nih min a thut ahcun upadi taktak ah a cang lai i hmual a ngei deuh hrimhrim lai, ati.
