Uknak firtu Myanmar ralkap nih, “Rakhine hriamtlai phu Arakan Army (AA) nih a kan kah ti lo caah le rampumpi ah daihnak a leng seh ti kan duh caah ralhrang cazin in kan hnawh cang,” tiah thawng a thanh.
Ralkap cu atu hi sandahpiahtu mipi kham ah an buai tuk lio asi.
AA cu ni kum ahkhan Suu Kyi acozah nih ralhrang cazin ah a khumhmi si.
“Ralhrang cazin ah khumhmi AA cu March 11, 2021 ah donghter asi cang. A kan kah ti lo caah le rampumpi ah a hmunmi daihnak ser kan duh caah asi,” tiah ralkap tadinza Mirror Daily nih a thanh.
AA biachimtu Khine Thu Kha nih, “Rakhine mipi nih kum tampi chung buainak an tuar cang. Buainak a zormi le ralhrang cazin in a kan hnawhmi cu thil ṭha asi ko,” tiah a chim.
“Mah thawngthanhnak nih hin rampumpi buainak cu a daihter lai lo nain, Rakhine state chung buainak daihternak caah cun lam sialtu asi ko lai,” ati.
Myanmar ram ah hriamtlai phu 24 leng an um. Cheukhat nih cun ralkap nih Myanmar rampi uknak a chuhmi an lungtlinlonak le sandahpiahtu mipi lei an ṭannak kong thawng an thanh len, nain ralkap cu an tu taktak lo i Rampumpi Kahngol Lungtlinnak (NCA) sachoh zong an buar taktak lo.
AA balte cu mipi kan dirkamh hna ti zong a thanh lo pinah, Rakhine state ahcun sandahpiah zong a tlawm ngai.
AA ralkap cu Rakhine miphun Buddhist deuh lawngte an si. Rakhine state cu hlan lio kum zabu 18nk (18th century) tiang cu amah tein aa rak ukmi ramkulh asi.
