Kan hnu zarh Mandalay sandahpiah lio ah alu ah meithal in an kah i a thimi Kyal Sin, kum 19 cu ‘kanmah thahmi si lo’ tiah ralkap nih thawng an thanh.
Ralkap nih, “Kyal Sin alu ruh chungah ummi kuan hi palek meithal kuan asi lo,” ati.
Uknak firtu ralkap cozah nih mipi a thahmi hna ai pheh i voi 2nak asi cang. Liamcia zarh 2 lio ah Naypyitaw ah an kah thahmi kum 20 ngaknu zong “kanmah thahmi si lo” an ti hoi.
Kyal Sin cu Nithumni ahkhan Mandalay sandahpiah lio ah alu ah an kah i a nunnak liam. A hmutu pawl nih “meithal kuan taktak in an kah” tiah an chim.
A ruak an vui ni 1 hnu ah ralkap nih a thlan an cawh i a ruak cu an hlai.
Ralkap tadinca nih, “Kyal Sin ruak felfai tein check loin an vui caah check dingin ralkap nih an hlai” tiin a thanh – a thlan an hlainak kong cu mah hi hmet law rel khawh si.
“Alu ruh chungah ummi kuan cu palek meithal kuan asi lo,” ati.
Kyal Sin an kah thah lio ahhin palek lawng si loin ralkap zong an um ti cu sandahpiah lio hmanthlak pawl ah fiang tukin hmuh khawh asi.
Ralkap tadinca nih cun, “palek nih cun sandahpiahtu hmailei in an kham hna nain Kyal Sin cu hnulei in an kah,” ati.
Sandahpiah lio video zoh tikah Kyal Sin cu hnulei aa mer lio ah an kah ti fiang tein hmuh khawh asi. Mah ruangah hmailei in an kahmi si ko nain alu hnulei ah an khennak si.
February 1 ah ralkap nih uknak a fir thokin atutiang ah minung 54 leng an kah thah cang hna. Minung 1,700 leng an tlaih cang hna, tiah UN nih a thanh.
Ningani ahkhan UN Security Council nih kutka kharkhumh in Myanmar kong meeting a tuah nain Myanmar ralkap lehrulh dingin zeihmanh bia a khiak lo.
Ralkap a bawm pengmi China UN palai Zhang Jun nih, “Myanmar nawlngeihnak hi ramdang nih upat ding asi (i thlak awk si lo,” ati.
