Myanmar refugee pa nih “zaangfah tein ka nupi thlah ko sawh” tiah tangka in palek a nawl caah an tlaih ve i “palek ziknawh case” in kum 3 le cheu thong an thlak pinah RM15,000 dan an tat.
A nupi palek nih an tlaih cu ni kum August thla ahkhan si nain tuni ceo ah biaceihzung nih bia a khiah.
Biaceihtu Datuk Ahmad nih, “RM15,000 dan kan tatmi hi a liam khawh lo ahcun thla 12 chung thongthlak chap ding,” tiin bia a khiah.
Malaysia um Chinmi zong kan chungkhat le hawikom palek nih an tlaih tikah tangka in nawl (ziknawh) kan hman caah i ralrin ngai kan hau. Lampi ah ziknawh cu tlawmte aa ning deuh, sinain sakhan phak cang hnu ahcun ziknawh hrimhrim lo ding; CRC, ACR, UNHCR, tbk., sinah bawmh hal a ṭha cem.
Kum 26 Myanmar refugee pa cu UNHCR card aa tlaihmi asi. Palek nih a nupi an tlaih caah ni kum August 19 ah Kuantan Palek Sakhan Headquarters khaan 3 ah palek senthum Mohd Shahrul a va ton i zaangfah tein ka nupi cu thlah ko sawh tiah RM3,000 in a nawl.
Myanmar refugee pa cu a min ah Zainal Hussein (Rohingya) asi. A nupi cu UNHCR card a ngeih lo ruangah palek nih an tlaih.
Taza an cuainak case cu tuni ah Rohingya holhlet nih thangpi in biaceihzung chungah a relpiak.
“Ka palh ko” tiah aa phuan.
A sihni Mohammed Badrulzzaman nih, “anih hi ani ca tein aa hlawhfa mi miharsa asi, palek nih a nupi an tlaih lio hi fa a pawi lio si i atu cu thonginn chungah fa a hring cang, zei kan ti hnga dantatnak neemter deuh ko sawh uh,” tiin a nawl piak.
Tazacuaitu hi Malaysia Eihmuar Dotu Zung (MACC) lutlai chang Kamariah Seman asi, “mipi nih palek ziknawh an rim nakhnga fak taktak in dantat” tiin biaceihtu a hal.
A tambik kum 20 tiang thongthlak pinah RM10,000 silole a ziknawhmi nak let 5 tam deuh dantat khawhnak upadi in taza an cuai i atu bantukin kum 3 le cheu thong an thlak pinah RM15,000 dan an tat hi si.
