Caankarlak cozah NUG nih, “Mipi Vengtu Ralkap kan dirh cang,” tiah nizaan May 5 ah thawng a thanh.
NUG nih, “Ralhrang ralkap cozah nih mipi cozah cu uknak a chuh i hruaitu pawl a tlaih thongthlak hna pinah, hremuknak a duh lomi mipi zong ruru hranghrang in a thah hna, thongthlak hna, federal democracy ngah aa zuammi tlangcung miphun hriamtlai phu pawl le mipi zong vanlawng tiangin a hleihluat in a kah thah peng hna,” tiah ralkap a dirhnak aruang cu a chim.
“Ralhrang ralkap nih cun kan ram nawlngeihnak hmunhter lo, mipi himter lo le minung nunnak upat loin mipi innlo a hrawhpiak hna pinah kan ram zong federal democracy ngah kho lo dingin a kham.
“Mah dirhmun kan phak caah, NUG cozah cu ralkap nih mipi ral bantukin ruru hranghran in a kahmi hna donghter ding, kum 70 chung aa peh cangmi ramchung ral donghter ding, runvennak ṭha tein remh ding le federal ram dirh dingin ṭuanvo kan hung ngei.
“Cucaah, NUG cozah nih Federal Ram Ralkap hramthoknak caah Mipi Vengtu Ralkap (People’s Defence Force) cu runvennak phungphai ning tein May 5 ah kan dirh,” tiah thawng a thanh.
