Buai lo tein ralkap duhlonak a langhtertu mipi ralkap le palek nih an kah thah hna hnu in Myanmar rampumpi ah palek 100 leng nih ralkap duhlonak an langhter ve i CDM an lut cang.
Atutiang ah Yangon, Mandalay, Monwya, Myinchan, Mawlamyine, Dawei le Sagaing ah sandahpiahtu minung 54 leng an kah thah cang hna.
Yangon palek sakhan bawi Colonel Tin Min Tun, kum 54 nih, “cozah rianṭuan pawl nih an thokmi rampumpi CDM hi tha pek ka duh ve caah ka lahkhah le rian cu ka hlawt ve,” tiah a chim.
CDM a lutmi palek vialte lakah rank sangbik asi.
“Ralkap uknak tangah rianṭuan (ralkap caah rianṭuan) ka duh lo. Rampumpi palek vialte cu atu hi ralkap nih ningcang loin mipi hremnak le thahnawnnak caah a hman hna,” tiah a chim. Kum 31 chung palek rian a ṭuan cangmi si.
Palek bawi CDM a luh cangka in a kuttang palek pawl zong an lut thluahmah ve.
Palek Kyaw Lin Oo nih, “tuah awk asi ti ka hngalh ko buin ka tuah lo ahcun hmailei ah kaa ngaihchih sual lai,” tiah CDM a luhnak kong a chim ve. “Palek nakin mipi cungah dawtnak le titsa ka ngei deuh,” ati.
A hawile palek 2 zong CDM an lut ve. An cunglei bawi nih an kawl hna i an chungkhar an tlerh hna caah atu hi an zaam i an i thup rih ko.
Nithumni ah Tanintharyi ramkulh palek 7 zong CDM an lut ve.
“Ralkap nih upadi ning loin mipi tukvelh le thahnawn a kan fial caah kan duh lo. Ralkap nawlchuahmi kan zul kho lo,” an ti.
Nihnihni ah Kachin state ah palek 17 CDM an lut ve.
Chin state Hakha, Thantlang, Falam, Matupi, Tedim, Mindat, tbk. palek cheukhat zong CDM an lut ve hna.
Naypyitaw palek 70 leng CDM an lut ve cang.
February thla thokka in atutiang ah rampumpi khuapi kip ah palek pawl CDM an lut thluahmah hna i an dihlak 100 leng an si cang lai tiah zumh asi.
Palek upadi ning ahcun cunglei bawi nawlpeknak tel loin rian bau cu kum 3 tiang thongthlak khawh an si nain ram le miphun dawtnak he an pah chih.
Tu zarh thokka ahkhan Karen state i Hpapun pengah ralkap 12 zong CDM an lut ve i Karen hriamtlai phu KNU sinah an zaam.
