Chin state thlanglei, Paletwa peng chung i ralzaam tambik an umnak Paletwa le Samee khua ah a ummi ralzaam camp (IDPs Camp) pawl cu atu tein remh lo ahcun fur tikah harnak nganpi an tong kho tiah mibawmtu bu nih an chim.
Samee khua um ralzaam camp pawl cu rua in sakmi a si i rua pawl cu an mot cang caah remh colh a hau tiah ralzaam bawmhnak petu People Hope chungtel U Zaw Li nih a chim.
“Ralzaam pawl cu hika hmun ah an i dor rih ko lai ti si ahcun ni kum ah rua in rak sak cangmi kha atu ca ah zeiti hmanh in si kho lo. An tthing tuk cang i an rop dih. Umnak ah a ttha ti lo. Pakhat khat kan tokhan lo ahcun harnak nganpi an tong kho,” tiah U Zaw Li nih a chim.
Samee khua ah ralzaam camp 5 um i inn 800 leng a um. Ralzaam 3,000 leng fai an um. WFP nih thla fatin facang, chiti le cite bawmhnak a pek ko hna nain ngandamnak zohkhenhtu an ngei lo.
Paletwa khua ah a ummi ralzaam camp pawl zong a ttuang le vampang cu rua in sakmi a si caah rua pawl an rop cang i umnak ding ah a ttha ti lo. Fur tikah harnak tong ding an si.
“Atu an umnak pawl hi ni kum fur lio ah rak sakmi an si i rua lawngte in sakmi a si tikah kum 1 hrawng lawng a nguh. A tu ahcun kum 1 tling cang i an umnak hmun cio ah an kir rih lo ding si ahcun remh piak an hau.
“WFP nih cun rawl lawng bawmhnak a pek hna i mibawmtu dang zong an um lo tikah a dangdang bawmhnak an hmu lo,” tiah Paletwa ralzaam bawmtu U Zar Ni nih a chim.
Paletwa khua ah ralzaam camp 10 um i inn 1,000 leng a um. Ralzaam 5,000 hrawng an si.
A luancia April 4 ahkhan thilchia hrang i Paletwa peng chung ralzaam pawl an umnak inn 400 dengmang a hrawh.
February 1, 2021 ah ralkap nih uknak a lak hnu in Paletwa peng chung ralzaam pawl cu ralkap nih bawmhnak a pe hna lo.
Mi bawmtu dang pawl zong nih atu lio Kawlram boruak ruangah a hlan bantuk in bawmhnak an pe kho ti hna lo. – Khonumthung
