President hlun Donald Trump nih nudokpadok pawl US ralkap luh a phihmi hna cu President Joe Biden nih president nawlngeihnak hmangin a hrawh colh.
Pu Trump nih president a ṭuan kum 1nak bakah a phihmi, phun dangin chim ahcun Trump nih biapi tukin a ruahmi cu Biden nih president a ṭuan ni 4nak ah a hrawh colh ai.
President Biden nih, “nudokpadok pawl US ralkap luh phih cu nudokpadok thlanglamh asi caah ka hrawh. A fiang tuk ko. Mizei paoh ralkap an luh khawh i langhan te le i lunghmuih tein an ṭuan khawh ahhin America a him deuh,” ati.
“Ralkap a ṭuanmi nudokpadok pawl cu nudokpadok an si ruangah phuah le ṭhen an tong ti lai lo,” tiin White House nih a thanh.
“President Biden nih, nupa sinak hi ralkap ṭuannak ah dawntu asi awk si lo, America rammi kan i dannak hi kan ṭhawnnak asi ati,” tiah White House nih a langhter.
Kum 2019 ah US ralkap nudokpadok 8,980 an um, tiah Ralkap Vuanci Zung cazin nih a langhter. 2020 cazin cu a langhter lo.
Ralkap Vuanci thar Lloyd Austin nih, “nudokpadok pawl ralkap an luh khawhnak hnga le nudokpadok an simi thuhnawh lo tein ralkap an ṭuan khawhnak hnga a rannak in policy kan ser colh lai,” ati.
Trump nih kum 2017 ah “nudokpadok pawl cu an sizung kalnak caah ralkap tangka tamtuk a dih caah le ralkap thazaang der tertu an si caah ralkap luhter an si ti lai lo pinah, a ṭuan liomi zong ṭuanter an si ti lai lo” tiin a rak thanh.
Kum 2019 April thla thok cun nudokpadok pawl cu US ralkap luh an phih taktak hna. A ṭuan liomi tu cu an ṭuanter ko hna.
Nudokpadok pawl US ralkap luhter hi US ram caah a ṭha maw? Hi kongah Biden maw a ṭha deuh Trump dah? Na ruahning comment ve.
