Pu Biak Ceu cu Mie Fellowship aiawh in Malaysia ah Alliance Of Chin Refugees (ACR) an rak dirhka thokin ACR thawngpang ttialtu Editor rian a rak ttuanmi a si.
Chin ralzaam hna caah thawngpang a rak ttial lengmangtu si i 2010, US ram a kal hlan tiang ACR rianpekmi vialte tlamtling tein a rak ttuanmi a si.
Pu Biak Ceu cu January 10 ahkhan hi vawlei nunnak in a liam i mah kongah ACR nih an ngaihchiatnak an langhter.
“Pu Biak Ceu nih tuan tuk ah a kan liamtak caah ACR rianttuan vialte kan ngaih a chia. ACR dirhka tein ACR ah rian a rak ttuanmi a si.
“Zeitik hmanh ah kan philh lai lo. Pathian kut ah dai tein aa din tiin kan zumh i thla zong kan campiak.
“Malaysia ah khua a sami Chinmi dihlak aiawh in, tantakmi chungkhar nan ngaihchiatnak kan in hrawmpi hna. Thla zong kan in campiak hna.” tiin ACR nih cathanh a chuah.
Pu Biak Ceu (kum 64) cu Indiana Chin Baptist Church chungtel a si i January 10, 2021, zaanlei sml 2:30pm hrawngah ah takpum damlonak in a sertu Pathian sin ah zungzal ca in a kan dinhtak.
A nupi Pi Men Tluai le fapa pathum a rohtaak hna.
Pu Biak Ceu cu ram le miphun ca ah nun thaap in CNF/A ah a rak lut i kum saupi ralbawi rian tiang a rak ttuanmi a si.
A luancia kum 2 hrawng in damlonak (thin le cuap cancer) nih a tlak i, siibawi te le chungkhar nih a tthabik in an conghhramh ko nain dam lei panh ti lo in a tu ah takpum in a kan tthen hi a si.
