US Kawlrammi Zohkhenhnak Bu (Burmese American Community Institute – BACI) hruaitu Pu Elaisa Vahnie nih Washington D.C. ah US cozah le senators pawl ni 3 chung (June 13 – 15) a ton hna, tiah kan theih.
Biapi bikin an i ceihmi cu;
- Myanmar ram democracy ngahter ṭhan dingin US nih fak deuh in bawmh ding
- Ramchung ramleng Myanmar ralzaam pawl bawmhnak tam deuh pek ding
- Myanmar – India ramri ralzaam pawl bawmhnak pek a herh ning
- India um Myanmar ralzaam pawl ram thumnak kal kho dingin India cozah nih exit permit a pek hna herh ning
- Malaysia le India um Myanmar ralzaam hna UNHCR (RSD) nih a rannak in rianṭuan a herh ning
- Ramthumnak ummi nih ramhnihnak um an chungkhar lak khawh a herh ning
- Myanmar democracy ngah ṭhannak caah Federal Constitution thar le Ralkap thar ser a herh ning, hna hi an si.
“Federal democracy taktak kan hmuh khawhnak hnga US nih budget le thazaang tam deuh chuah a herh tuknak kong zong kan i ruah. India in Myanmar (Laitlang) ah bawmhnak kuat ngahter zokzok a herhnak kong zong kan i ruah,” tiah Pu Vahnie nih a chim.
Kan Myanmar ram ser ṭhannak dingah;
- Federal Constitution ser ding
- Federal Army ser ding
- A ṭhawngmi cozah le mipi bu (public institutions) hna ser ding le
- Ramdang pawl he fek le kau deuh in pehtlaihnak ngeih ding hi a biapi tuk, tiah a chimchap.
