Pyi Ti Oo le Eaindra Kyaw Zin cu palek le ralkap nih an tlaih hna, tiah ralhrang Myanmar ralkap media MRTV le Myawaddy nih April 9 zaan 8pm ah an thanh.
Academy laksawng tiang a ngahmi minta minthang taktak a simi Pyi Ti Oo le a thaisung Eaindra Kyaw Zin cu ralkap duhlo langhternak (CDM) an tuah ruangah an tlaih hna hi si.
April 9 zaanlei ahkhan Yangon, Bahan peng um an inn ah an tlaih hna, tiah MRTV le Myawaddy TV nih an chim.
“An fale 2 an tlaih hmasa hna i ‘nan hung chuah lo cun nan fale kan kalpi hna lai’ tiin an tlerh hna caah anmah tein an i ap lawlaw,” tiah thawngla Kyaw Hsan Hlaing nih a chim.
Ralhrang ralkap nih ngakchia hna hriamnam caah an hman hna hi cu minung zong an si lo.
Anmah lawng si loin, mintami Thet Mon Myint telh in minta, mintami, model, movie director, awṭha, tbk minthang 150 hrawng zong “CDM an tuah ruangah” ralhrang ralkap nih tlaih dingin nawl a chuah cang.
