Myanmar rampumpi RC khrihfabu vialte a uktu Cardinal Charles Maung Bo le ralhrang bawizik Min Aung Hlaing nuam takin Christmas changreu an khuaiṭi lio hmanthlak nih Myanmar mipi lungkuai in a chiah hna, tiah AFP media nih a ṭial.
Khrihfa tamnak Chin state, Karen le Kachin state ah khrihfa biakinn le mipi inn torlecheng a duahtu le mipi tampi a that i Chin state, Tedim peng zongah Chin khrihfa nu a tlaihhremtu ralhrang bawipa he mirh zuaimai in caan a hmangṭi mi RC bawizik Charles Maung Bo cungah Myanmar mipi an lungfak ngai.
Ralhrang media Global New Light of Myanmar tadinca nih, “Nizaan ah Min Aung Hlaing le Cardinal Charles Maung Bo tonbiaruahnak an ngei. Ram daihnak le ṭhanchonak kong an i ruah,” tiin a ṭial.
Maung Bo cu kum 2015 ah vawleipumpi RC bawizik Pope Francis nih Myanmar rampumpi RC bawizik Cardinal ah a thimmi si.
Cardinal Charles Bo bak nih Min Aung Hlaing he nuam takin Christmas changreu an khuaiṭi lio hmantlak cu Twitter ah aa tar – aa lunghmuih tuk rua.
Ralhrang media nih a tarmi hmanthlak pakhat ahcun Kawlram RC bawizik le ralhrang bawizik cu Christmas thingkung hmai ah an ṭhu. Hmanthlak pakhat ahcun ralhrang bawizik nih tangka ting 200 a hlut.
Ralhrang bawizik Min Aung Hlaing le a tapeh pawl nih February 1 ah mipi thimmi cozah uknak an chuh thokin atutiang ah sualnak ngei lo mipi 1,300 leng an thah cang hna.
Kanmah Chin state zongah ngakchia he, nu he tar he mino he tampi thah an tong cang. Thantlang khua inn ṭhabik 600 hrawng an kan duahpiak cang.
Falam pengah Rialti khua ningin an duah. Thlanrawn, Taal, tbk zongah inn tampi an duah. Chin state lawngah Khrihfa biakinn 30 hrawng an duah cang.
Minung pakhat nih, “Khrihfa biakinn a duahtu ralhrang bawizik bak RC bawizik nih a ton duh komi hi cu lungdong asi. Hipa sinah hohmanh an i pumh awk le thla an cam awk si lo,” tiin a lungrawhnak a ṭial.
Midang pakhat nih, “Mah nih hin RC mipi a kan huap bak lo. Zei ruang dah lainawngpa he cun changreu na khuai?” tiin a ṭial ve.
