Tuni December 5 zingka ah ralhrang hruaitu Min Aung Hlaing nih a holh kho ti lomi NLD member U Tin Oo a ton.
U Tin Oo cu kum 1974 hrawngah Myanmar Ralkap Bawizik (atu lio Min Aung Hlaing rank) a rak ṭuanmi si nain Ne Win nih a phuah hnu ah NLD ah a lut i NLD Vice President zong a rak tuan. ‘Ralkap titsa na phoh’ tiin uknak firtu Ne Win nih thong a rak thlak peng – Atu cu kum 94 asi cang pinah a zeng (lephiat) i holh hmah a holh kho ti lo, lam zong a kal kho ti lo.
Tu zingka ah Yangon ramṭhen, Bahan khua a inn ah ralhrang hruaitu Min Aung Hlaing nih a hung tonmi kong cu U Tin Oo a tunu May Chu Lwin nih hitin a chim.
![](https://thechinexpress.com/wp-content/uploads/2021/12/U-Tin-Oo-1024x683.jpg)
“Papa cu a tar tuk cang i a zengmi si caah lam zong a kal kho ti lo i a holh zong holh kho ti lomi asi.
“Mah ruangah papa nih a inn ah a hung tongtu hi a al kho lo i a tonnak si. Papa nih cun bia kaa khat hmanh a let kho lai lo.
“Papa a chungkhat vialte nih an chimmi ka theihmi cu, papa nih NLD uniform i hruk in a ton.
“A zeng i bia a chim khawh ti lo caah ralkap uknak a duh lomi kha pinni ṭaihpung (NLD uniform) in a langhtermi asi lai tiah ka zumh,” ati.
Pinni ṭaihpung (NLD uniform) cu hlan lio tein ralkap duhlo langhternak (hmelchunhnak) caah an rak sermi asi.
![](https://thechinexpress.com/wp-content/uploads/2021/12/U-Tin-Oo-a-ton-1024x682.jpg)
Ralhrang hruaitu Min Aung Hlaing nih hin Ralkap Bawizik hlun U Tin Oo lawng si loin Bogalay Tint Aung le Prime Minister (ralkap bawi) hlun Khin Nyunt zong a ton hna, tiah ralkap biachimtu Ralbawi Zaw Min Tun nih media sinah a chim.
![](https://thechinexpress.com/wp-content/uploads/2021/12/U-Tin-Oo-si.jpg)