Myanmar ralkap bawizik Min Aung Hlaing nih uknak a chuhmi President U Win Myint le Rampi Ruahnak Petu Daw Aung San Suu Kyi cu tu zingka ah kum 4 veve thong a thlak hna.
Nain, kum 2 ah a ṭhumhpiak ṭhan hna, tiah tuzaan nazi 8 ah ralkap media Myawady TV nih a thanh.
“SAC Chairman Ralbawizik Min Aung Hlaing nih Daw Aung San Suu Kyi le U Win Myint cu thong an tlak ding kum 4 kha a ngaihthiam hna i kum 2 ah a ṭhumhpiak hna.
“Cun, annih cu thonginn ah kuat loin atu an umnak hmun ahhin pehtlai in an chiah hna lai,” ati.
Suu Kyi thong an thlakmi cu UN le ramdang nih atanglei bangin an ruahning an chim.
United Nations (UN)
“Ralkap nih a ukmi biaceihzung ah a thlithup in biaceihnak deu a tuah i Myanmar Ram Ruahnak Petu thong a thlakmi hi cu zeihmanh si lo, ramkhel ruang (uknak chuh an duh ruang) ah asi ko,” tiah UN Nuhrin Covo Lutlai Michelle Bachelet nih cathanh a chuah.
United Kingdom
“Aung San Suu Kyi thong an thlakmi hi uknak chuttu Myanmar ralkap nih amah dotu pawl an thawh phih dingin tuksapur thil a tuah ṭhanmi si,” tiah UK Ramdang Vuanci Liz Truss nih a chim.
“Uknak chuttu Myanmar ralkap nih ramkhel ruang a tlaih thongthlakmi vialte thlah dih hna sehlaw, cabuai cung biaruahnak tuah in democracy lam ah kirnak ong seh. Mipi thimmi ramkheltu pawl tatte um loin thong a thlakmi hna hi buainak chuah chinchinnak asi,” ati.
China
“Aa dawmi innpa kan si bang, Myanmar ram ṭuanvo ngeitu vialte hna hi hmailei caan saupi tiang ram ṭhatnak caah rianṭuan ṭi hna seh ti kan duh. An i theihthiamlonak vialte cu phunghram le upadi ningin remnak tuah hna sehlaw Myanmar ram nih har le fe in a rak hmuhmi democracy lam thluan kha pehzulh hna seh ti kan duh,” tiah China Ramdang Vuanci Zung biachimtu Zhao Lijian nih a chim.
NUG cozah
“A rawk cangmi an biaceihnak nih thil dik a chuahpi lai lo ti cu ka ruahcia te asi ko,” tiah ramleng um ralkap dotu NUG cozah Mei le Seh Vuanci Maw Htun Aung nih a chim.
