Uknak firtu ralhrang Myanmar ralkap nih helicopter cungin an kah hna caah PDF ralkap 2 le Hnankhar khuami 7 an nunnak liam — Hnankhar khua cu Magway ramṭhen, Gangaw pengah a ummi si.
“Myanmar ralkap a dotu PDF pawl hi NUG cozah nih hriamnam na pek hna lawngah Gangaw pengkulh khuate pawl hi an ven khawh lai tiin NUG cozah sinah hriamnam bawmh kan hal,” tian Hnankhar Mino Bu nih cathanh a chuah.
December 17 ah Gangaw peng, Hnankhar khuate ah Myanmar ralkap nih helicopter in a hung kah hna i ralkap thazaang zong tampi a chap.
Mah ralkap pawl cu tuni ah Hnankhar khua pawngkam vialte ah duhpaoh in meithal an puah caah pawngkam khuate mi tampi cu nunnak kawl in an zaam hna, tiah khuami pakhat nih a chim.
Myanmar ralkap le PDF pawl cu atu hi Myinthar khuate pawngah an i kah lio asi, tiah Myinthar khuami pakhat nih a chim.
September thla zong ahkhan Myanmar ralkap pawl nih Gangaw peng khuate pawl ah lut in khuami an hrem hna caah Hnankhar khua pawngah PDF nih an kah hna i tlawmpal an rak hliam hna.
Mah ruangah Myanmar ralkap pawl nih Hnankhar khua inn pawl an duah khangh piak lengmang hna i atutiang ahhin voi 5 bak an duah piak cang hna caah inn tamtuk an kaang dih cang. Khuami pawl cu an zaamnak ramtang ah an i dor peng ko.
