Nai hrawng cu Kawlrawn ah ralkap inn bomb puah le ralkap minung thah in zaamtak a tam tuk caah ralkap bawi an chungkhar pawl an thinphang tuk cang, tiah The Irrawaddy nih a thanh.
Rampumpi palik vialte uktu Ramchung Vuanci Zung bawi (ralkap) an chungkhar pawl cu an thinphan tuknak ah thih an i tim cang, ati.
“Ṭihnung an si!” tiah Ramchung Vuanci Lieutenant General Soe Htut a nupi Daw Nilar Sein nih a thinphannak kong aa phuan.
Daw Nilar Sein hruainak in ralkap bawi nupi pawl, nai ah Viber group call in meeting an tuah lio aw cu Mratt Channel nih a tar.
Ralhrang Kawl Ralkap nih uknak a fir hnu in rammi 800 leng a thah cang hna caah atu hi Kawlrawn ah ralkap minung pawl inn bomb puah le thah in zaamtak a tamtuk. Bomb puahtu le ralkap minung thattu cu kanmah kan si tiin zei bantuk bu hmah nih an i phuang duh rih lo. Chin, Kayah, Kachin, Karen, tbk state pawl ah mipi nih fak piin ralkap an doh hna i tampi an thah fawn cang hna. Mah ruangah ralkap bawi chungkhar pawl an thinphan tuk hi si.
Daw Nilar Sein nih ralkap bawi nupi pawl cu, “Ralkap bawi lian inn pawl bomb puah dingin dothlennak tuahtu pawl nih Naypyitaw um Pyinmana ah an ralkap 30 an thlah hna ti thawngpang ka theih,” tiah a chimh hna.
“Nan inn ah a rami zung rianṭuan ka si aa timi pawl kha ṭha tein check dih hna uh. Zaan zongah ralring tein it uh.
“Leng nan chuah tikah, nan bodyguard palik pawl kha uniform hruk ter hna hlah uh.
“Nan mawṭaw chungah uniform aa hrukmi an hmuh hna ahcun, nan mawṭaw ah bomb an hmenh lai.
“Nan fale zong zaan ah restaurant ah ṭhut ter hna hlah uh. Dothlennak tuahtu thawng petu pawl nih an hmuh sual hna lai.
“Ṭih an nung tuk. Ṭihnung tuk lawlaw,” tiah ralkap bawi nupi pawl cu a chimh hna.
NUG cozah Facebook ah report uh
Daw Nilar Sein nih ralkap bawi nupi pawl cu ralrin a pek hna pinah, ralkap dotu NUG cozah le pumpak an Facebook account pawl cu hloh dingin Facebook sinah report uh, tiin nawl a pek hna.
“Dr. Zaw Wai Soe (NUG Fimcawnnak Vuanci) le Facebook ah a lar ngaimi Pencilo an account kha Facebook ah report peng hna uh.
“Amah ruangah ralkap le palik sakhan bomb puah le kah an ton hi si. Dr. Zaw Wai Soe a aw hrang nih kan thin aa ka phanter.
“A Facebook account kha ni fatin nazi pakhat dan pengin report uh. A biachim mi hi hopaoh nih biatak tein an i lak caah ṭihnung tuk.
“Pencilo zong hi ralkap le ralkap chungkhar huatnak bia lawngte a chim peng caah report peng ve uh.
“Anmah 2 ruang ahhin kan palik pawl thah an tong. Anmah pahnih hi an i bawm.
“Tuzaan thokin report peng hna uh. Nan thiam lo ahcun nan fale hal hna uh,” tiah nawl a pek hna.
