Monywa hrambunh biazai ttialthiam Ko Khet Thi@Zaw Tun cu Sagaing ramtthen, Shwebo khua ah ralkap nih an tlaih i, sml 24 tlin hlan ah a thi tiah a chungkhar nih an chim.
Kum 44 simi Ko Khet Thi cu a nupi Chaw Suh he May 8 zaan ah Shwebo um an inn ah ralkap nih an tlaih hna.
Ralkap nih a nupi cu Shwebo palek sakhan ah an hren nain Ko Khet Thi cu hmun dang ah an kalpi i an hremnak ah a thi tiin chungkhar lei nih an chim.
A thihnak kong cu May 9 zingka ah palek nih chungkhar an hei thanh hna.
“Bia an hal lio ah zeihmanh a holh lo caah an velhnak ah a thi. Zaan sml 9 hrawngah an tlaih. Zingka ah Monywa sizung ah an kalpi i lampi ah a thi,” tiah Ko Khet Thi a naupa nih a chim.
Ko Khet Thi i a ruak an zoh tikah a ttang, a ban le zaktang ah a dukmi hma an hmuh.
A nupi nih, “Palek nih ka va a thihmi kong an ka chim lo. Sizung ah kal dingin an ka chimh. Sizung ahcun ka kal i ka va cu thlop khawh ding sicun thlop ko uh ka ti hna.
“Nain, a tuahmi man a zun an ka ti cangka in an thahmi si ti ka fiang. An tlaih lio ahhin a zeihmanh ti lo, zawtnak zong ngei lo,” tiah a chim.
Ralkap nih February 1, 2021 ah uknak a lak hnu, mi tampi a thah hna ruangah Ko Khet Thi nih “An Lu Ah An Kah Hna, Dothlennak Cu Kan Thinlung Ah A Um Ti Hi An Hngal Lo” timi biazai a ttialmi i a lar taktak.
Ralkap nih biazai ttial thiam 2 a thah cang hna. – Myanmar Now
