Uknak chuhmi hmasa cozah hruaitu Pi Aung San Suu Kyi cu uknak chuttu Myanmar ralkap nih tuni ah kum 4 thong a thlak.
President Win Myint zong kum 4 thong a thlak ve.
“Buainak chuahpi dingin mipi na forh hna” tiin le “2020 thimnak tuah lio ah COVID-19 zulhphung na buar” tiin Suu Kyi kum 4 thong an thlak hi si. Suu Kyi ṭanhtu pawl nih cun “Ralkap nih lih hrokhrawl in case a tuah i thongthlakmi si” an ti.
Suu Kyi thong an thlakmi cu UN le ramdang nih atanglei bangin an ruahning an chim.
United Nations (UN)
“Ralkap nih a ukmi biaceihzung ah a thlithup in biaceihnak deu a tuah i Myanmar Ram Ruahnak Petu thong a thlakmi hi cu zeihmanh si lo, ramkhel ruang (uknak chuh an duh ruang) ah asi ko,” tiah UN Nuhrin Covo Lutlai Michelle Bachelet nih cathanh a chuah.
United Kingdom
“Aung San Suu Kyi thong an thlakmi hi uknak chuttu Myanmar ralkap nih amah dotu pawl an thawh phih dingin tuksapur thil a tuah ṭhanmi si,” tiah UK Ramdang Vuanci Liz Truss nih a chim.
“Uknak chuttu Myanmar ralkap nih ramkhel ruang a tlaih thongthlakmi vialte thlah dih hna sehlaw, cabuai cung biaruahnak tuah in democracy lam ah kirnak ong seh. Mipi thimmi ramkheltu pawl tatte um loin thong a thlakmi hna hi buainak chuah chinchinnak asi,” ati.
China
“Aa dawmi innpa kan si bang, Myanmar ram ṭuanvo ngeitu vialte hna hi hmailei caan saupi tiang ram ṭhatnak caah rianṭuan ṭi hna seh ti kan duh. An i theihthiamlonak vialte cu phunghram le upadi ningin remnak tuah hna sehlaw Myanmar ram nih har le fe in a rak hmuhmi democracy lam thluan kha pehzulh hna seh ti kan duh,” tiah China Ramdang Vuanci Zung biachimtu Zhao Lijian nih a chim.
NUG cozah
“A rawk cangmi an biaceihnak nih thil dik a chuahpi lai lo ti cu ka ruahcia te asi ko,” tiah ramleng um ralkap dotu NUG cozah Mei le Seh Vuanci Maw Htun Aung nih a chim.
