Ralkap nih NLD cozah uknak a chuh hnu in rampumpi state le region cozah vialte a phuah dih hna i amah ukmi minung a ṭuanter hna.
Chin State Cozah lutlai Salai Lian Luai zong a phuah i amah hmunhma ah Pu Terence San Mawi Nikhuai a ṭuanter.
Cun, cozah kalning zong a thlen dih. ‘Chin State Government’ timi kha “Chin State Administrative Council” tiin hlan lio ralkap uknak chan ah an hman ningin a thlen. Liamcia kum 50 ah a kan kirpi kan ti lai cu.
“Vuancichoh (Chief Minister)” timi zong “Chairman of Chin State Administrative Council (siman-auhchoh-hmuh-kaungsi-auhkaṭhah)” tiin a thlen.
Chin mipi lawng si loin Myanmar rammi vialte a rawitu ralkap lei ah a ṭangmi, ralkap nawlngeihnak in Chin mipi a kan uktu ding Pu Terence San Mawi Nikhuai cu mizei dah asi?
Chin state, Falam peng Lumte khuami asi. Dr. Nikhuai fapa asi. Dr. Nikhuai cu England ram ah sibawi a rak kai i ram uktu U Nu nih Yangon ah sibawi ṭuan a rak ti nain Falam Sizung ah ṭuan aa rak thim. Amah ṭuan chungah Falam Sizung a minthang.
Pu Terence San Mawi Nikhuai cu atu lio hi Chin State Biaceihzung Sangbik biaceihtu a ṭuan liomi si. A fel ngaimi si, tiah a ṭuan hawi nih an chim.
Chinmi nih kan bochanmi kan pale hi zei ruang dah ralkap le USDP lei ah an ṭan peng hnga? Hakha, Thantlang, Tedim, Paletwa, Matupi, tbk. lei zongah Chin mifim thiam tampi cu ralkap le USDP lei ah an ṭang.
