March 12 chun sml 12:00pm hrawng ah ralkap le palek nih Hakha sizung an luh hnawh. Mizaw zual 30 le rianttuantu 315 nih sizung an chuah tak.
Ralkap nih sizung rianttuan pawl cu CDM nan tuah ahcun sizung in chuak dih uh. A tangmi nan um ahcun kanmah he sizung hi ttuanvo kan lak tti lai an ti hna.
CDM nan tuah ding asi ahcun zaanlei sml 3:00pm hlan ah sizung in chuak dih uh an ti hna.
Sizung rianttuan, nawl ngeitu le ralkap cu biaruahnak an ngei nain a donghnak ahcun sibawi te nih Hakha sizung cu kan chuah tak ko lai tiin bia an khiah.
Sibawi, nurse le sizung rianttuan pawl nih rian kan ttuan ti lai lo, CDM ah kan lut dih lai an ti i sizung cu an chuah tak dih.
Sibawi le nurse pawl nih an mizaw hna zong an i chuah pi chih.
Hakha mino pawl nih sizung rianttuan pawl an thilri tthial an bawmh hna.
Hakha sizung rianttuan pawl cu Laitlang hmunkip le Kawlrawn tiang in a rami an si. Nikum ahkhan quarter tamnawn an sak i a chung ah sizung rianttuan tampi an um hna.
Khuami le sizung rianttuan pawl hitluk mitthli he an i ciah lio ah an pawng in ralkap le palek nih meithal in an hngah hna. Thlachiat an ruat hrimhrim lo.
Sizung rianttuan pawl umnak ding ah CDM mino pawl nih khua chungah hmunhma an timh lamhpiak hna. Khrihfabu nih an inn, an lo, anhmun an lawnh piak hna.
Innkhan lawng a ngeimi nih an innkhan an hmanter hna.
