Myanmar Alin thawngzamhca nih Hakha ah ralkap tlaihmi minung 2 an thi tiah May 12 ah a ttial.
Hakha, Khuathar sang um, golfkun pawngah Pu Tler Ling le Pu Khamh Bawi cu ralkap nih biahal dingin kalpi an timh hna nain an zaam caah ralkap le palek nih tlaih dingin an kawl hna.
Pu Tler Ling cu Nawi anmah lo ah an tlaih, Pu Khamh Bawi cu Khuathar sang um Pi Hnem Zing inn ah aa thuh lio ah an tlaih ve. An pahnih in May 9 ah an tlaih hna i May 11 ah an thi.
Pu Tler Ling le Pu Khamh Bawi cu Khuathar sang ah ummi an si i ralkap le palek nih bia an hal hna hnu ah Khuathar sang um vemi Pu Za Cung inn ah Lai meithal 2 le hmanbilu 2 an tlaih chih.
Ralkap tlaihmi Pu Tler Ling le Pu Khamh Bawi cu a dam lomi an si caah Hakha sizung ah an chiah hna nain an tthat hlei lo caah Kalay Ralkap sizung ah an kuat hna.
Zaanlei suimilaam 2:00pm ah Pu Tler Ling cu a thi. Cun, Pu Khamh Bawi zong zaanlei suimilaam 2:45pm ah a thi ve tiin Myanmar Alin nih a langhter.
Pu Tler Ling cu thikai zawtnak ngeimi a si. Pu Khamh Bawi zong cuap lei zawtnak a ngei mi a si.
Pu Khamh Bawi cu Thantlang peng, Thangzang khuami a si. Pu Tler Ling cu Hniarlawn khuami a si.
Ralkap nih Pu Tler Ling hi COVID-19 zawtnak a ngeih caah Kalay ah mei in kan khangh tiah an chim. Pu Khamh Bawi ruak zong an khangh chih ve.
