Nizaan UN meeting ah uknak firtu Myanmar ralkap hi ramdang nih fak piin dantat uh, a titu Myanmar UN palai U Kyaw Moe Tun cu uknak firtu ralkap nih “ram rawitu (နိုင်ငံတော်သစ္စာဖောက်) asi” tiin thawng a thanh.
Ram a rawi i UN meeting kainak nawl a ngeihmi cu ningcanglo in a hman caah tuni thokin Myanmar UN palai rian in kan phuah, tiah uknak firtu ralkap MRTV ah thawng a thanh.
U Kyaw Moe Tun cu NLD acozah nih Myanmar UN palai rian a rak pekmi si.
Nizaan UN meeting ah, “UN, UN Security Council le ramdang vialte nih uknak firtu ralkap hi fak piin dan kan tatpiak uh …” tiin a hal hna.
Mah pinah, “keimah cu mipi thimmi mipi cozah aiawhtu ka si …,” ati i Dr. Sasa UN palai rian a petu Rampumpi Hluttaw Aiawhtu Kawmiṭi (CRPH) a dirpinak kong zong a chim.
Cun, Kawl holh in Myanmar mipi zong ngol loin ralkap duhlonak langhter peng dingin a forhfial hna i “mipi hi nan biapi bik, ralkap uknak kan hrawh hrimhrim lai,” tiah ṭah aw in a chim i a kutdong zung 3 a thir.
Dr. Ngun Cung Lian le Pu Ngun San Aung nih hi tluk a chiakha mi ralkap an ṭanh hi cu khuaruahhar si ko. Nizaan zongah sandahpiahmi nu meithal in an kah thah. Tuni zong Hakha, Yangon le Mandalay ah Chinmi 20 leng an tlaih hna. An chungkhar vialte mitthli he lungrethei in an chiah hna.
