Zarhteni ahkhan Karen hriamtlai phu KNU nih Myanmar ralkap a kah i an sakhan 1 a chuh hna.
Suimilaam tlawmpal hnu ah ralkap nih vanlawng in bomb tampi an hung thlak i Karen mipi 3 an thi, adang 8 hliam an tuar. Khuami inn 1 zong ciam dihlak in bomb nih a tlak kangh.
Nizaan, Zarhpini ah ralkap nih vanlawng in bomb a thlak ṭhan caah Karen mipi 3,000 leng nih an inn an zaamtak i nunnak kawl in Thailand ramri ramtang ah an zaam.
Karen mipi 3,000 leng cu nizaan khan Thailand ram an lut cang, nain khua chung cu an lut lo, Myanmar ramri pawng ramtang ah an i dor.
NGO le KNU nih, “Mipi 3,000 leng cu nizaan ahkhan Myanmar – Thailand ramri Salween tiva an tan i Thailand ah an lut cang,” tiah tuni ah an thanh.
KNU cu kum 2015 ahkhan Myanmar cozah he i kah ti lo dingin Rampumpi Kahngol Lungtlinnak (Nationwide Ceasefire Agreement – NCA) sachoh ah min a thumi si.
February 1 ah ralkap nih uknak a fir caah KNU nih “Uknak na firmi kan cohlang lo, cucaah duhlonak langhtertu mipi kan dirkamh hna,” tiin cathanh a chuah.
KNU Ramdang Vuanci Zung lutlai Padoh Saw Taw Nee nih, “Myanmar ralkap nih vanlawng in bomb a thlak ruangah mipi 4,000 leng ramtang ah an zaam,” tiah a chim.
Thailand media Thai BPS zong nih, “Karen state in minung 3,000 leng cu Thailand ram Mae Hong Son ramkulh ah an hung zaam,” tiah a fehter ve.
Thailand cozah lutlai Prime Minister Prayuth Chan-ocha nih, “Myanmar rammi tampi an hung zaam te lai ti kan ruah caah rawl le dornak pek dingin kan i timcia ko, nain zeizat dah an hung zaam lai ti cu kan hngal rih lo,” ati.
Thailand cozah nih cun Myanmar ralkap nih uknak a firmi hi a mawhchiat lo. A rengreng ah Thailand Prime Minister zong hi ralkap bawizik asi i uknak a fir vemi asi. Min Aung Hlaing he an i lo.
Myanmar ralkap nih February 1 ah uknak a fir thokin sandahpiahtu mipi meithal in a kah peng hna i rammi 459 a thah cang hna. Ngakchia zong tampi an i tel.
Chin state le Sagaing region zongin palek le ralkap telh in Myanmar rammi 700 hrawng cu India ram, Mizoram, Manipur, Assam le Nagaland states pawl ah an zaam cang, tiah India media pawl nih an thanh.
Sinain, India cozah lutlai Prime Minister Narendra Modi acozah nih a duh lo caah state cozah pawl cu “rak tlai hna ulaw khirh dih hna uh” tiin nawl a pek.
Nain, Mizoram state cozah lutlai Vuancichoh Zoramthanga nih a duh lo, “Mizo le Chin cu chungkhat kan si. Mizo nih harnak kan rak ton lio zongah Chin state ah kan rak zaam i a kan zohkhenhtu an si” tiin Pu Modi cu ca a kuat.
