Ralkap uknak kan duh lo tiin online ah cattial le hmanthlak in a langhtertu Ayeyarwady ramtthen, Kyangin (ကြံခင်း) khua palek 2 cu nizaan ah kum 1 veve thong an thlak hna.
Palek 2 cu Thu Rain Linn le Tryar Linn an si i unau an si.
“Palek upadi in thong kum 1 thlak an si,” tiah Kyangin palek nih an ti.
Thu Rain Linn le Tryar Linn cu hmasa ahcun Kyangin palek sakhan ah hren an si i a hnu ah Pathein ah an kuat hna.
“Ka fale 2 cu khoika thong ah dah an kuat hna ti kan hngal rih lo.
“Palek rianttuanmi ka fale 2 cu ralkap uknak duh lo ruangah atu bantuk in thongthlak an tonmi hi kaa uang tuk hna,” tiah tlaih tongmi hna i an pa U Thant Sin nih a chim.
A fapa upa deuh Thu Rain Linn cu palek a ttuannak kum 7 si cang. A fahniang Tryar Linn cu palek rian a ttuannak kum 4 a si.
Mipi ca rianttuan dingin palek kan luhmi a si. Ralkap ca rianttuan dingah palek kan luhmi si lo.
Ralkap namnehnak hi mipi lei ah ttang in kan ven lai tiin online ah an ttial ruangah atu bantuk in tlaih le thongthlak an i huah hi a si. – RFA
