NUG cozah a cohlangtu le ṭanpitu ramdang le UN cu uknak firtu Kawl Ralkap Cozah nih a mawhchiat hna.
Uknak firtu Kawl Ralkap Cozah Ramdang Vuanci Zung nih, “Ralhrang le phungninglo bu a simi NUG le CRPH cu ramdang cozah palai pawl le MP pawl nih an pehtlaih lengmang hna,” tiah duhlonak cathanh a chuah.
Europe Ramkomh Hluttaw nih, “NUG le CPRH cu Myanmar cozah taktak an si tiin kan cohlan,” tiin bia a chah hnu ah atu bantukin uknak firtu ralkap cozah nih duhlonak cathanh a chuah hi si.
Myanmar Ralkap Cozah nih ‘kanmah hi Myanmar cozah taktak ah ramdang nih kan cohlang hna seh’ tiin aa zuam pengmi asi. Mah lio ah Europe ram 27 komh hluttaw (Europe Ramkomh Hluttaw) nih NUG a cohlan cu an caah ek khor tlak bantuk asi.
Tuan deuh zongah, France Hluttaw Sang nih NUG cu Myanmar cozah taktak asi tiin a cohlan ve cang.
NUG cozah nih atu hi US, UK, France, Czech Republic, Australia le South Korea ah ‘palai zung’ a on cang hna.
Uknak firtu Kawl Ralkap Cozah Ramdang Vuanci Zung nih cun, “Ramdang nih NUG nan cohlanmi le nan ram ah palai zung nan on termi nih hin ramchung ah an ralhrang cawlcanghnak a ṭhawnter lai i party-tling democracy ram dirh kan i timhmi harnak a kan pek lai,” tiah ramdang pawl cu a mawhchiat hna.
“Nan thil tuahmi hi kan ram chung thil kongah nan i thlak asi. Ralhrang rianṭuannak hi dirpi hlah uh, kanmah tu hi ralhrang doh kan bawm uh,” ati hna.
