2020 thimnak ah mipi nih thimmi MP pawl nih an dirhmi Rampumpi Hluttaw Aiawhtu Kawmiṭi (CRPH) nih Rammi Lungrualnak Cozah (NUG) a dirhmi cu CHRO nih tuni ah kan conglawmh, tiah Chin Nuhrin Covo Bu (CHRO) nih cathanh a chuah.
NUG an dirhmi hi Myanmar mipi dihlak luatnak, nuhrin covo, i tlukruannak le democracy ngahnak caah a biapi tukmi le tuanbia ah a hmun ding kar nganpi kan hlan asi, ati.
Zei miphun le biaknak ti um loin Myanmar rammi vialte hi lungrual tein NUG hnu ah an dir a herh, cun phungninglo ralkap cozah hi rianṭuan kho lo dingin le cohlan lo ding an cawlcangh ṭi a herh.
Atu lio a biapi tukmi caan ah NUG an dirhmi hi mahte khuakhan lairelnak (federal), daihnak, ṭhanchonak le democracy ngahnak caah caanṭha asi. Mah caanṭha hi NUG nih, liamcia ralkap cozah le mipi cozah nih an i palhmi – miphun lungrual lonak a chuahtertu hrampi a simi federal phungphai ningin miphun dihlak ramkhel covo aa tluk tein an pek hna lomi – kha lungfimnak caah a hman hrimhrim a herh.
“Atu cun NUG cu a muimi le a fek lomi phungninglo ralkap cozah nakin a ceu deuh i zumh awk tlak deuh asi caah, ramdang zong nih NUG hi Myanmar cozah dik asi tiin pomnak caanṭha le rian an ngei,” tiah CHRO hruaitu Salai Bawi Lian Mang nih a chim.
![](https://thechinexpress.com/wp-content/uploads/2021/04/172582430_4113992735318907_8898144978567360671_n-791x1024.jpg)