Atu lio Mizoram ah a lar bikmi thawngpang lakah aa telmi pakhat cu Mizo ngaknu CT Ramnunmawii nih a theih bal lomi COVID-19 mizaw kum 93 tarnu sizung ah a riahpi mi kong asi.
Hi tluk COVId-19 pulrai chia kha lakah theih bal lomi COVID-19 mizaw sizung ah riahpi cu …, tiah mipi nih an thangṭhat tuk.
Samaria miṭha pa bantuk a simi Mizo ngaknu CT Ramnunmawii cu Mizoram, Champhai peng Ruantlang khuami asi.
Delhi ah a tlawng i a kir lei ah COVID-19 zawtnak a ngeih caah cozah nih mizaw a thlop hna nak BSUP ah an chiah ve.
A dam i khua lei tlun a timh lio ah, “Tarnu pakhat cu a chungkhar vialte quarantine an tuah dih hna caah umpi ngei loin mah sizung ahhin a um” timi thawngpang a theih.
Mah thawngpang a theih cangka in “Keimah nih ka umpi lai i ka zohkhenh lai” tiin nawlngeitu a hal hna. Nawlngeitu nih an sianh ve i khua lei tlung loin sizung ahcun COVID-19 mizaw kum 93 tarnu cu a umpi i tirawl le herhhai a zohkhenh.
“Hi bantuk caan harsa lio hmanh ah, hi tluk in dawtnak le mi zawnruahnak a ngeih caah kan thangṭhat tuk,” tiah Mizoraminsta nih a ṭial.
Hi bantuk lio caan ahcun mi tampi cu anmah zawn lawng an i ruat i midang an philh tawn hna, mah lio caan ah hi bantuk minung a rak um cu lawmh lo awk a ṭha lo.
Samaria miṭha bantuk a simi Mizo ngaknu thawngpang nih cun Mizoram a cul dih cang. Minung thong tam taktak nih an like i an comment.
