Sang Hlei Thang nih $2,000 in a singkhaw tu, vawlei cung Laipa aa paimi vialte lakah a nganbikmi Thangtu a tei i CDF caah $2,000 (Kawlram ting 30) a hlut.
An i paih ka ah Thangtu nih a tengh hmasa nain, hnu ah Sang Hlei Thang nih a pehpeh in voi 2 a tengh i atei.
Thangtu hi Laipa ahcun a khan sang taktak. A ngan taktak fawn, 111.6 kg (246 lbs) a rit. Sang Hlei Thang hi Laipa ahcun a khan sang bak ve nain Thangtu nih a lonh ngai. 104 kg (239 lbs) a rit. Vawlei cung Laipa aa paimi vialte lakah a nganbik lei an si veve i an tha zong ṭhawng taktak.
Sang Hlei Thang
Sang Hlei Thang nih, “Tuni ah teinak ka hmuh ahcun tangka thong 2 ($2,000) ka hlut lai ka ti bantukin ka hlut. Atu upa kut ah ka pek hna. [Laitlang] mino hna nih uknak ṭhalo an teinak caah si ko seh,” tiah CDF caah a hlut.
![](https://thechinexpress.com/wp-content/uploads/2021/08/Sang-Hlei-Thang-1024x683.jpg)
“Miphun caah paihnak a kan tuahpiaktu kan pale nan cungah ka lawm, upatnak kan pek hna,” tiah CDF caah paih in tangka kawlnak a tuahtu upa pawl cungah lunglawmhnak bia zong a chim.
Thantlang peng, Zophei tlang, Hriphi khuami Sang Hlei Thang hi nupi le fa 3 a ngeimi si nain zuu le kuak a tawng lomi, sikan ngeimi asi caah a ṭhawng taktak rih.
“Nupi le fa 3 a ngeimi ka si. Ka nupi a min cu Sui Chin Par asi. Patung cu rianṭuan le chungkhar zoh a hauh caah gym tuah hi a fawi lo ngai nain ka nupi nih thazaang aa ka pek i aa ka theihthiam tuk caah zarh 1 ah voi 5 peng gym ka tuah kho. Ka nupi cungah kaa lawm tuk,” tiah 2019 aa paih lai ah a nupi cungah aa lawmhnak a rak chim bal — patung caah cun nupi le hi an rak biapi ngai.
Thangtu
Thangtu nih, “Tutan hi gym tuah ka daithlang bak. Ka paw puar tuk, ka rit tuk i ka cawlcang kho lo. Atu nai zong kha i din rih sih ka ti. Hi bantukin ka sunghmi hi zei tik hmanh paih zuam lonak lungthin asi lo. Ṭhat deuhnak lam lawngte ah aa ka kalpi,” tiah a chim.
![](https://thechinexpress.com/wp-content/uploads/2021/08/Thangtu-1024x683.jpg)
“Tu hnu kum 1 siloah tu kum November thla ah paih an tuah ṭhan ahcun ka ra ṭhan lai i champion ka lak dih cang lai.
“Cun, Sang Hlei Thang hi tutan ah paih ka singkhaw mi lunglawm tein aa ka cohlan i … vei a ṭhawng bak. Amah bantukin fa ngeimi ahhin … Laipa ahhin a ṭhawngmi hi an um lo. Amah hi ka upat bak, a cungah lunglawmhnak tampi zong ka ngei. Aa zuam bak.
“Hmailei ahcun ṭha tein ka cinh cang lai i hmailei ahcun pakhat lawngte ka suai lai tiah tu kum November thla cu ka tim,” tiah a chim.
Thangtu cu Hakha peng Dauchim khuami, tlangval, nungak nih pehtlaih khawh asi.