Australia Hluttaw Sang chungtel Senator Dean Smith nih Australia Hluttaw ah Australia Ramdang Vuanci Marise Payne cu Myanmar ralkap uknak chuh kong a hal.
Senator Dean Smith cu Australia phan Chin kan pale hna thawngin Chinmi a kan daw ngaimi asi. UNHCR nih Chin refugee hlawt a kan timh lio zongah Malaysia ra in UNHCR le Australia Tanzung a kan tonpiak.
Myanmar kong a halmi cu Ramdang Vuanci Marise Payne nih, “Nizaan zongah ka chim cang bangin, Myanmar ralkap nih uknak an chuhmi cu Australia cozah kan lungṭha lo tuk hringhran,” tiah a leh.
“Myanmar thil sining hi zeitik paoh ah aa thleng khomi asi, a fek rih lo. Yangon le khualipi Naypyitaw cu phone le internet zong fakpi in an phih.
“Ralkap nih thimnak thar kan tuah lai tiin thawng an thanh. Nizaan ah cathanh ka chuahmi bangin, ralkap nih upadi upat hna sehlaw an lungtlinlonak cu upadi tu in tawlrel hna seh, cun phungninglo in an tlaihmi mipi thimmi hruaitu vialte a rannak in thlah dih hna seh.
“November, 2020 rampumpi thimnak phichuak ning tein tluang tein rampumpi hluttaw meeting tuahter hna seh, tiah Australia cozah nih kan forhfial hna.
“Myanmar um Australia rammi pawl an himnak le umkalnak kongkau cu Yangon um kan tanzung nih a tawlrel cuahmah,” ati.
