Myanmar ralkap nih January 3 ah biakinn 2 telh in Thantlang khua inn 40 leng an khangh ṭhan. An khanghmi dihlak inn 727 leng asi cang.
Biakinn an khanghmi 2 cu Methodist Church le Gospel Baptist Church an si.
Chin Nuhrin Covo Bu (CHRO) nih, “Myanmar ralkap nih January 3 ah Methodist Church le Gospel Baptist Church telh in Thantlang inn 40 leng ciam dihlak in an khangh hna,” tiah a chim.
“September 18 ah Thantlang khua, Sianginn Sang an rak duah khangh lio i a himmi pawngkam inn le biakinn pawl kha tutan ah ciam dihlak in an khangh hna.
“September 9, 2021 in January 3, 2022 tiangah inn 727 leng an khangh cang,” ati.
As of Jan 3, 727 houses and structures, inclding 7 churches and a dozen religious buildings have been burned in Thantlang since Sept. 9 as the junta continues to engage in arson attacks aimed at reducing it to ashes. The troops responsible are from LID66, LIB269, LIB11, & LIB222. pic.twitter.com/OaEGnY10in
— ChinHumanRightsOrg (@ChinHumanRights) January 5, 2022
Thantlang khua cu inn 2,000 hrawng a um i minung 10,000 hrawng an umnak asi.
Thantlang khuami vialte cu September thla dongh lai ah India ramri lei ah an zaam dih cang hna. Cheukhat cu ramri khuate ah an i dor, cheukhat cu India ram, Mizoram state ah an zaam.
Tangka ting thong tampi dih in sakmi, Thantlang khua a dawhtertu zalampi tomi inn ṭhabik le dawr vialte cu Myanmar ralkap nih an khanghmi inn 727 chung ahhin an ciam dih cang.
Thantlang khuami thong tampi cu ral daih hnu ah kir duh hmanh hna sehlaw inn an ngeih ti lo pinah an thilri vialte zong a kangh dih cang caah an harsa tuk lai. Asi khawh ahcun ralzaam sok in ram thumnak hna phan kho hna sehlaw an caah a ṭha deuh ngai lai – ramchung ramleng kan pale hna nih ram thumnak kal kho dingin chimrel (advocate) piak hna sehlaw ṭha tuk hnga.
India ram, Mizoram state i Farkawn khua ah a zaammi Pi Mah Tial nih, “Ka fale 3 hi sianginn an kai khawh i rian an ṭuan khawhnak hnga ram thumnak ah kal kho hna seh ti ka duh,” tiah vawleicung media nganbik a si vemi Reuters sinah a chim.
“A liam cangmi cu khirh awk ṭha ti lo. Ka fale kong ka ruah ah ka lungrethei. Ka fale tal hi cu an khuasak fawi deuhte seh ti ka duhpiak hna,” ati — mah hi hmet law tling tein Reuters ṭialmi rel khawh asi.
Chin state cu minung ting 4 fai lawng kan umnak asi. 2021 February ah Myanmar ralkap le USDP nih mipi thimmi cozah uknak an chuh thokin Chin state mipi thong 70 (70,000) hrawng ralzaam dirhmun ah kan um cang. 30,000 hrawng cu ramleng ah an zaam i 40,000 hrawng cu ramchung khuate le ramtang ah an zaam hna.
