“Atutiang ahhin CBCUSA nih semnak Kawlram ralkap duhlo langhternak CDM caah $520,000 (Kawlram ting thong 7 le ting 300 leng) kan hlut cang,” tiah CBCUSA President Rev. Dr. Thawngling Mualhlun nih thawng a thanh.
CBCUSA (Chin Baptist Churches USA) cu USA ram um Chin baptist khrihfabu 112 i funtomnak bu asi.
Rev. Dr. Thawngling Mualhlun nih, “$520,000 chungah $200,000 (dollar ting 2) hrawng hi kan kuat lio asi. A phan cangmi zong um i a phan rih lomi zong a um,” ati.
An kuat rih lomi dollar ting 3 le thong 20 (Kawlram ting thong 4 le ting 500 leng) um rih tinak asi.
“Kawlram ah faknak a tuarmi, thisen a luangmi le zalam cungah ralkap duhlonak a langhtertu kan in dirkamhmi hna kan langhter zong asi i teimak tein i zuam peng rih ko uh ti zong kan forhfial hna.
“Khat le khat i soisel caan asi lo. Zeidah a ṭha bik lai timi khuaruah, ruahnak i cheuh le thazaang i pek caan asi.
“CBCUSA nih mah tiang lawng hi CDM caah bawmhnak kan pe lai lo. Ralkap uknak ṭha lo kan thluk khawh hlan lo pehzulh in CDM kan in bawmh peng hna lai.
“Ramchung um mipi nan thachia hin hlah uh. US um nan miphun nih rawl cawknak caah cozah nih a bawmhmi hna (foodstamp) tangka tiang an in chuahpiak hna i CDM caah an hlut. Suimilaam 8 chung rianṭuan tawnmi zong suimilaam 12 chung an ṭuan i caanhlei an ṭuanmi vialte CDM caah an hlut,” tiah Kawlram um kan miphun zong thazaang a pek hna.
