Facebook a ngeitu Meta company nih, “Myanmar ralkap tlaihmi company vialte cu Facebook hman ka phih dih hna lai, an Facebook account, page le group ka thahpiak dih hna lai,” tiin nizaan ah thawngthanh. Hmasa zongah Myanmar ralkap bawi vialte a phih dih cang hna.
Myanmar ralkap tlaihmi company vialte cu February thla thok khan Facebook ah an thilri cawngia phih dih an si cang. Tutan cu Facebook hman hrimhrim phih an si cang lai.
“Mah company pawl nihhin tangka in Myanmar ralkap an bawmh tiah zatlang bu le ramdang bu pawl nih an ti caah atu bantukin Facebook hman phih hna dingin bia kan chahnak hi asi,” tiah nizaan ah Meta nih thawngthanh.
UN Thildik-Hlattu Phu, Myanmar Zatlang Bu le Justice for Myanmar le Burma Campaign Uk nih ‘Myanmar ralkap he aa pehtlaimi asi’ an timi paoh cu an Facebook account, page le group khar/thah piak dih an si cang lai.
Meta company i Asia Pacific hruaitu Rafael Frankel nih, “Myanmar ralkap he aa pehtlaimi Facebook account, page le group 100 leng kan hlonhpiak cang hna,” tiah a chim.
Facebook cu Myanmar mipi nih an hman bikmi, ni fatin an hmanmi social media asi bang sandahpiahtu le ralkap uknak dotu vialte zong nih an hman bikmi asi. Facebook nih ralkap he aa pehtlaimi (ralkap ṭanhtu) account, page le group pawl a thahpiak thluahmahmi hna hi khatlei cun Myanmar mipi a kan bawmh ngaingai asi ve.
Kum 2017 hrawng ahkhan cun Facebook nih Myanmar kong hi aa rak buaipi lo. Myanmar mipi nih an tarmi paoh a onh viar caah Rohingya huatu pawl nih an tarmi pawl kha FB ah an rak lar tuk. Minung tampi nih an like, comment i share.
Cucaah Rohingya le anmah bawmtu sihni pawl nih, “A nangmah Facebook nih Rohingya huatnak pawl delete loin minung tampi sin na phawtzamh ruangah Myanmar ram ah Rohingya huatnak a karh chinchin i kum 2017 ah Rohingya 10,000 hrawng thah an tong, Rohingya ting 10 leng inn khanghpiak, tlaihhrem le miphun cihmih an tong… cucaah Rohingya pawl hi $150 billion liamh hna” tiin US le UK ram ah taza an cuai lio asi.
Kum 2017 ah Myanmar ralkap le Rakhine mipi nih Rohingya an thah hna hnu cun ramdang nih fak tukin Facebook an mawhchiat caah atu cu Rohingya huatnak a tarmi account le Myanmar ralkap account pawl cu Facebook nih a hngalh cangka in a thahpiak thluahmah hna.
Phun dangin chim ahcun, Facebook nih Facebook ah Rohingya huatnak karh le Myanmar ralkap ṭanhnak karhter a duh ti lo – ralkap tapeh USDP member Chinmi pawl zong kha ‘ralkap tapeh USDP member asi…’ tiin an FB account nan report piak hna ahcun thahpiak an tong ve ko lai.
