Malaysia le India um Chinmi tampi Australia an phak khawhnak hnga mi tampi hmuh dingin share cio usih.
Malaysia le India um Chin ralzaam hna caah thawngpang ṭha taktak pakhat cu Australia cozah thar nih CSP man tampi a ṭhumhmi hi si. CSP (Community Support Program) cu Australia ummi nih tangka in Malaysia le India um ralzaam laknak program asi.
Cozah sinah visa man $19,444 liam asi tawnmi kha $7,270 ah a ṭhumh. $12,000 leng bak a ṭhum. Cucaah, nikum i minung pakhat laknak caah a hramthok in Australia phak tiang $42,000 hrawng a dihmi kha atu cu $29,000 hrawng lawng a dih cang.
South Australia (Adelaide) ah ummi lebang cu ARA (Australian Refugee Association) zungah sok ahcun $20,000 hrawng lawng a dih – hmet law zoh. Mah pinah, Australia na phak thla 12 hnu ah $6,000 an in khirh te lai.
Australia cozah sinah liam ding cu $8,000 hmanh a tling lo nain sokpiaktu zung (APO) pawl nih ‘sokpiak man’ an lakmi a tamtuk caah hi zat a dihnak si.
Australia ram chung ahhin sokpiaktu (APO) zung tampi an um. AMES Australia le IOM hi rampumpi ah zung an ngei nain AMES Australia cu sokpiak man an lakmi a tam tuk caah anmah sinah sok ahcun minung pakhat laknak caah $29,000 hrawng a dih, IOM sin ahcun $22,000 fai lawng a dih.
Minung 2 (nuva) lak lawlaw aa kaih deuh, aruang cu a nupi/va lakchihnak caah $7,000 fai lawng a dih.
Hi zat tangka cu zeitin dah kan ngeih lai?
Na ngeih lo zongah Australia ah dawtu chungkhat na ngeih ahcun bank ah an cawipiak khawh ko. Na phak tik balte ahkhan an cawipiakmi he aṭu he na cham hau. Nain, na chungkhat kha inn cawk aa tim liomi asi ahcun an cawipiak kho lai lo.
$20,000 – $30,000 cu kan phak hnu ah kan cham kho lai maw?
Nan ngandam ahcun nan cham khawh tuk lai. Fa ngei lomi nuva (nuva in rianṭuan khomi) nan si ahcun kum 1 chung ah fawi tukin nan cham dih lai. Kum 2 lole 3nk ahcun motor le inn nan caw kho cang lai.
Nan ngamh/sok lo ahcun Malaysia le India ah alaka in kum 2 kum 3 nan i tap lai tangka zong zei pipa nan khong kho hlei lai lo.
Cucaah, Australia ah chungkhat lole hawikom a ngei i tangka a damh/cawi khomi nih cun sok bak ding asi. A phu tuk. Keimah zong naite ah CSP in Australia ka phan ve i $100,000 hmanh in sok phu asi ka ti. $20,000 – $30,000 cu a saubik kum 2 ahcun nan cham dih lai, sok lo ahcun Malaysia lole India ah alaka in kum 2 lole zungzal nan i tap lai i a paam tuk.
Zeitin dah kan sok lai?
Australia ummi nan chungkhat kha chim hna ulaw anmah nih sokpiaktu zung (APO) sinah an sok lai. Acunglei ka chim bantukin South Australia ummi nih cun ARA le state dang ummi nih cun IOM sinah sok a hlawk cem.
