UN ah aho nih dah Myanmar ram a aiawh lai timi cu nizaan Nithumni ah UN committee nih an ceih i biachahnak tuah rih lo dingin an lungtling.
Cucaah, uknak firtu Myanmar ralkap cozah cu UN ah Myanmar ram aiawhnak nawl a ngei rih lo. Atu lio Myanmar UN Palai Pu Kyaw Moe Tun nih pehtlai in a aiawh rih ko lai.
UN phungphai ah, “Aiawhtu (palai) thar kan thim hlan chung paoh cu atu lio palai hi asi peng rih lai,” ti asi.
Uknak firtu Myanmar ralkap cozah cu ‘ramdang nih ka cohlang hna seh’ ti hi biatak tein aa zuam pengmi asi i UN ah Myanmar ram aiawh dingin a sok. NUG nih a sok ve i an i cuh.
Myanmar ralkap cozah nih cun ralkap hlun Aung Thurein nih UN ah Myanmar ram aiawh seh, tiin a sok. NUG cozah nih cun Pu Kyaw Moe Tun nih aiawh rih ko seh, tiin a sok ve. Pu Kyaw Moe Tun cu hmasa Pi Aung Sang Suu Kyi acozah nih ‘UN ah Myanmar ram aiawhtu ding palai’ ah a rak thimmi si i atu zong NUG lei a ṭang peng.
Kan hnu thla ah aa dinmi Myanmar ah UN lutlai aiawhtu hlun nih, “Uknak firtu Myanmar ralkap cu zei ram hmanh nih an cohlan awk asi lo” tiah ralrin peknak bia a chim.
UN lutlai Pu Guterres zong nih, “Myanmar ram uknak firtu ralkap thlak dingin ka tuah khawhmi paoh ka tuah dih lai,” tiin February thla ah a rak chim ve.
UN ah aho nih dah Myanmar ram a aiawh lai timi cu UN Chungtel Cohlangtu Kawmiṭi (credentials committee) nih ceih asi. Chungtel Cohlangtu Kawmiṭi ahcun Russia, China le US telh in ram 9 an i tel.
Ram 9 cu nizaan ah UN headquarters ah meṭing an tuah i UN chungtel ram 193 dihlak an sining zohfelnak le aiawhtu thar thimnak an tuah i ramdang kong cu tluang tein biachahnak an tuah dih ko nain Myanmar le Afghanistan kong cu biachahnak tuah rih lo dingin bia an chah hi si.
Liamcia thla 2 ah Taliban hriamtlai phu nih Afghanistan cozah a tuk i uknak a lak ve. UN ah Taliban nih Afghanistan ram aiawh dingin a sok nain UN nih biachahnak a tuahpiak duh ve lo. Cucaah uknak a chuhmi hmasa Afghanistan cozah palai Pu Ghulam Isaczai nih pehtlai in a aiawh ve lai.
