Rammi Lungrualnak Cozah (NUG) cu US, UK, Canada, Australia, New Zealand le EU nih an cohlan, tiah kan theih.
US le UK telh in EU chungtel ram tampi cozah palai pawl nih NUG cozah kan in cohlan hna, nanmah he rian kan ṭuanṭi lai an kan ti, tiah NUG nih tuni April 23 ah thawng a thanh.
“NUG cozah Ramdang Vuanci Changtu le Myanmar um ramdang tanzung hruaitu pawl meeting an tuah i atu lio rianrang in kan i tinhmi le hmailei caan saupi tiang kan i tinhmi pawl a chimh hna.
“Online in tuahmi meeting ahcun US, UK, Canada, Australia, New Zealand le Germany, France, Czech, Sweden, tbk EU chungtel ram cozah palai pawl an i tel. ASEAN chungtel ram cozah palai pawl zong an i tel.
“Meeting ah aa telmi ramdang cozah palai pawl nih cun, ‘NUG cozah nan dirhmi hi kan in cohlan hna, a herhmi kan in bawmh hna lai i nanmah he rian kan ṭuanṭi lai’ an kan ti.
“Meeting ahcun kanmah NUG lei in Ramdang Vuanci Changtu U Moe Zaw Oo, Myanmar UN Palai U Kyaw Moe Tun le Ramdang Pehtlaihnak Ṭuanvo latu U Htin Lin Aung an kai,” tiah NUG nih a thanh.
Mah kong cu ramchung media Myanmar Now zong nih a thanh ve. Myanmar Now cu thawngthanh a ṭhawn tuk caah naite khan uknak firtu ralkap cozah nih media license a chuhmi si, nain an zaamnak hmun in thawng an thanh peng.
