US Hluttaw Sang MP (Senator) 10 nih, Myanmar ralkap nih Rohingya a thahnawnmi hna kha ‘miphun cihmih’ asi le silo hlat dingin Hluttaw Sang ah upadi hran an chuahpi.
A hngal rih lomi um aikun – Kawlram ahcun Hluttaw Sang he Niam he chungtel pawl cu MP kan ti hna nain, US ahcun Hluttaw Sang chungtel pawl cu Senator tiin an auh hna. US Senator le Kawlram Hluttaw Sang (Amyotha Hluttaw) MP an i khat.
Mah upadi cu Hluttaw Sang (Senate) ah an ceih lai i an fehter ahcun, US Ramdang Vuanci Zung nih hlathlainak a tuah lai i ‘miphun cihmih’ asi le silo bia a chah lai.
Myanmar ram, Rakhine state um Rohingya pawl cu 2017 ah Myanmar ralkap nih a tukvelh, hrem, tlaih, tlaihhrem, thah i inn a duahpiak hna caah nunnak kawl in minung ting 7 le cheu (750,000) leng Bangladesh ram ah an zaam. Nihin tiang an kir ngam ti lo.
Myanmar ralkap nih Rohingya pawl a thahnawn hna ning cu US Ramdang Vuanci Zung, UN le Myanmar kong Thildik Hlattu Ramdang Bu (IFFMM) nih an rak hlat.
2018 ah, IFFMM nih “Myanmar ralkap nih Rohingya an thahnawn hna dan hi miphun cihmih duhnak lungput asi ko” tiah cathanh a rak chuah. Mah zong cu US Senator 10 nih cun upadi hran ah an telh.
Myanmar ralkap nih mipi cozah uknak a chuh hnu hrim cun Rohingya cihmih kong hi thinphang chinchin asi. Nuhrin covo an buarmi paoh cu US nih fak piin hma kan lak a herh, tiah Senator Pu Ed Markey (hmanthlak) nih a chim.
“Rohingya nih miphun cihmih an tonmi hi kan theihpiak hna lo ahcun, an cihmih aa zuammi minung pawl hi an tuhmi theipar zunter khawh an si lai lo. A rannak in an tuhmi theipar kan zunter khawh hna nakhnga Biden acozah nih ‘miphun cihmih asi’ tiin bia khiak zokzok seh ti ka duh,” tiah a chimchap.
