Lai pasal Tial Thang nih, “February 5 ah Myanmar ram aiawh in One Championship kun chungah kaa ṭhua ṭhan cang lai. Thazaang rak ka pe cio u” tiin ca a ṭial.
ONE Championship nih February 5 ahkhin Singapore ram ah ONE: UNBREAKABLE III timi tlangtar in puai tuah a timh.
Singapore le Malaysia caan 8:30pm ah an thok lai. Myanmar ahcun 7pm le Indianapolis ahcun 7:30am si lai. ONE Championship Youtube Channel ah free in zoh khawh si lai.
Mah ahcun, Tial Thang cu Indonesia pa “The Great King” tiah auhmi Paul Luminhi he aa ṭhua ding an si.
Atu hi a sayapa Aung La Nsang he ṭhuat an cinh cuahmah.
Tial Thang cu ONE Championship ah voi 2 aa ṭhua cang i voi 2 ning tein teinak a hmumi si.
MMA ah ‘Dragon Leg’ tiin an auhmi Tial Thang le Paul cu Bantamweight MMA in round 3 chung aa ṭhua ding an si.
Kum 33 simi Paul Lumihi cu 2019 kha a donghnak bik aa ṭhuat si i kum 1 chung ah pehzulh in voi 3 bak a sung. MMA ah voi 11 aa ṭhua cang i voi 7 teinak a hmu, voi 4 a sung.
“A luancia kaa ṭhuatnak ka zoh ṭhan tikah ka rak i palhnak tampi ka hmuh. A hlei in mitlaihnak hrawng ah a si. Cucaah, atu ahcun zeidah ka tuah awk a si ti ka hngalh cang.
“Tial Thang cu paih thiam a si caah a herh ka ti ahcun mi tlaihnak cu ka hman te lai. Sungh cu a phung si ko. Nain, tutan cu teinak ka hmu hrimhrim lai kaa zum ko. Ka fan pawl sinah ka thiamnak hmuhsak lai kaa ngaih tuk cang,” tiah Paul Lumihi nih a chim.
