US President hlun Donald Trump nih, “Kum 2024 ah president i cuh/lo kai sungphiat cang,” tiah Fox News ah a chim.
Nithumni ahkhan US-Mexico ramri pawngum South Texas airport ah Fox News thawngchimtu Sean Hannity nih interview a tuah i atu bantukin a chim hi si.
Sean Hannity nih, “Hmailai na simanking kong ceih tuah usih,” tiin Trump ati hnu ah mipi lei aa hoi i “President hi 2024 ah i cuh ṭhan seh ti nan duh maw?” tiah a hal hna.
Trump nih 2024 ah president kai cuh lai/lo ti cu zapi theih in fiang tein a thanh rih lo nain Sean Hannity sinah a chimmi ruah tikah aa sungphiat ko cang ti a fiang.
“Na ka let lai lo, nain hal hrimhrim na hau, [2024 ah president i cuh/lo] nai sungphiat cang maw?” tiah Sean Hannity nih a hal.
“Kai sungphiat cang,” tiah Trump nih fiang takin a leh.
Hannity nih, “Nai cuh ahcun, zeitluk in dah a har ti na hngalh ko khah, nain mah ral do ṭhan dingin timhcia a simi na lo ko,” ati.
Trump nih, “Ka duh caah asi lo teh,” tiah a leh. “Kan ram nih a herh caah si. Mah ram hi kan zohkhenh a hau. Duh ti cun ka duh lopi, mi he i doh peng cu a nuam maw i? I doh peng? Chim duhmi cu kan ram caah kan tuahmi kha a biapi tuk,” tiah a leh.
April thla ahcun, “Cuh/lo kai ruah lio asi,” tiin Hannity sinah a rak chim. Atu cu ‘kai sungphiat cang’ ati. Nain cuh dingin maw aa sungphiat asiloah cuh lo dingin dah aa sungphiat ti balte a chim lo.
Atang video ah zoh khawh asi.
