President Donald Trump ṭanhtu pawl nih US Hluttaw (U.S. Capitol) an baoh i Hluttaw palek 1 an thah. Trump ṭanhtu 4 an thi ve.
An baoh lio ahcun MP (representative le senator) vialte lusam hngal loin nunnak kawl in an zaam dih. Hluttaw cu palek tam taktak nih hriamnaam ṭhaṭha he an kulh dih ve i Trump ṭanhtu pawl he meithal in an i orh hna.
US representative le senator pawl cu Hluttaw ah Joe Biden nih Donald Trump a teimi fehter dingin meeting an tuah. Donald Trump nih “Hluttaw/Capitol ah Biden tei fehter an timh caah kham hna uh …” tiin a ṭanhtu pawl a tukforh hna caah atu bantuk thil a can hi si.
Trump ṭanhtu nu cu Hluttaw a baoh i Hluttaw Niam lei luh a timh lio ah uniform aa hruk lomi Hluttaw palek nih a ṭaang ah a kah. Khuachung sizung ah an kuat nain a thi.
Mah pinah, nu pakhat le pa 2 zong khawnden ruangah Hluttaw inntual ah an thi. Zei ti sat in dah an thih ti cu ruak hlaitu nih an check hnu lawngah kan hngalh lai, tiah palek nih an chim.
A tlawmbik ah, palek 14 paoh cu Trump ṭanhtu pawl nih an hliam hna. Palek pakhat lebang cu Trump ṭanhtu pawl nih an velhnak in a thaizing ah a thi.
Palek nih Trump ṭanhtu pawl sin in meithal 6 le mahte in serchommi bomb 2 an tlaih.
Atutiangah Trump ṭanhtu minung 120 an tlaih cang hna.
Hluttaw Palek (Capitol Police), Washington D.C. Khua Palek, FBI le National Guard ralkap tiang hriamnam ṭhaṭha he an hung chuak dih i Trump ṭanhtu pawl cu an kham hna.
Atu cu palek nih Hluttaw an lak khawh i him tein an ven khawh cang. MP (representative le senator) pawl zong cu an zaamnak hmun in Hluttaw ah an rung kir ṭhan i Biden teinak fehter dingin meeting an tuah ṭhan cang.
