Levi Sap Nei Thang nih US um Chinmi an thlenhripi pawt in an hmuhmi tangka $560,000 leng (Kawlram ting thong 8 deng) a hlen hna – an tangka aa lak nain an cawkmi a pe hna lo.
US cozah nih cozah vawlei ah zinaan le gas cawhnak nawl (oil and gas lease or drilling right) a zuarmi pawl cu ni kum July thla hrawng khan Levi Sap Nei Thang nih tam taktak a cawk. $3.7 million in US ram state 12 ah hmun 300 dengmang (dihlak fonh ekah 133,000 kau) ah zinaan le gas cawhnak nawl cu cozah sinah a cawk.
Mah lio cun Levi Sap Nei Thang nih, “Mahka hmun pawl ahhin zinaan le gas cawh ka duh caah ka cawkmi si,” tiin Reuters media sinah a rak chim.
Minung ting 6 leng nih an zulhmi a Facebook page ah live a thlah i cozah vawlei ah zinaan le gas cawhnak nawl a cawkmi cu US um Chinmi le Kawlrammi sinah ‘a hlawk tuk cu e kha e’ tiah azin nak let tam taktak in a zuarh hna pinah, an tangka aa lak riangmang i an cawkmi cu a pe hna lo.
A hngal rih lomi um aikun – US ram ahcun cozah nih cozah vawlei ah zinaan le gas cawhnak nawl (drilling rights) a zuar i $2 zongin cawk khawh asi, auction in a zuar. A vawlei kha cu cozah ta asi peng ko. A zuarmi cu vawlei kha si loin zinaan le gas cawhnak nawl (oil and gas lease or drilling right) lawng asi. Mah ruang cun zinaan company zong a si lomi Laimi pumpak luklak nih cun cawk lo ding. Na tangka le na caan na sung dih lai. “A hlawk tuk e, nai rumnak lai” tiin an zuarhtu cu na tangka fir a duhmi mi hrokhrawl an si.
Tuksapur aa thok
Levi Sap Nei Thang sinah zinaan le gas cawhnak nawl a cawmi minung 7 le an chungkhar cu Reuters media nih a pehtlaih hna i an cawknak sachoh pawl zong an piah dih.
Levi Sap Nei Thang nih a cawknak zin let 1 le cheu in let 13 tiang tam deuh in a zuarh hna pinah, an tangka cu aa lak riangmang i an cawkmi cu a pe hna lo.
Levi Sap Nei Thang sinah a cawmi Laimi 3 nih, “Levi Sap Nei Thang sinah a caw vemi midang tampi zong kan ton cang hna,” tiah an chim.
![](https://thechinexpress.com/wp-content/uploads/2021/03/122335710_2058130837654638_5483452731544402479_o-1024x768.jpg)
“October thla ahkhan, Levi Sap Nei Thang nih minung tampi cu Wyoming state ah amah he i tong dingin le zinaan/gas cawhnak hmun zoh dingin a kan auh i a kan zohpi,” tiah an chim. Amah sinah a cawmi pawl cu ‘ka unau, chungkhar le hawikom bantuk nan si’ ati hna – ka zum hna seh tiin a lor hna kan ti lai cu.
Hlennak – A cawmi minung 4 nih tangka zong an pek dih cang ko nain atutiang Levi Sap Nei Thang nih a ngeitu (owner) sinak a pe hna lo. US cozah record kan zoh i a ngeitu (owner) ah Levi Sap Nei Thang asi peng ko.
Levi Sap Nei Thang nih cozah vawlei hmun 300 dengmang ah zinaan le gas cawhnak nawl a cawkmi chung ahcun hmun 2 te lawng a cawtu sinah a pek. Mah hmun 2 a cawtu cu minung 1 asi, tiah US federal le state cozah record ah hmuh khawh asi.
Texas state ah sushi dawr a ngeimi Tha Cin zong nih ni kum September thla ahkhan Levi Sap Nei Thang sinah New Mexico state um hmun 2 cu a kumkum aa khonmi tangka $510,000 in a cawk ve. Hmun 2 ningin Levi Sap Nei Thang nih cozah sinah $200,000 lawngin a cawkmi si.
A zualhma taktakmi cu, ni kum September thla thok ah Tha Cin le a sihni nih an cawk cang nain nihin tiang Levi Sap Nei Thang nih a ngeitu sinak a pe hna lo. Cozah record kan zoh tikah a ngeitu (owner) Levi Sap Nei Thang ti peng asi rih. Tha Cin a sihni Jeff Vaughan nih, “Atutiang a ngeitu sinak pek lo cu ka khuaruahhar ko,” tiah a chim.
Tha Cin nih tangka a hmuhnak lo ding rumro “nai rumnak lai” tiin hlen i tangka tam taktak in zuarh pinah, a cawk hnu zongah a ngeitu sinak pek lo cu hlen chiahru taktak asi.
Tha Cin nih, “Levi Sap Nei Thang cu Facebook live a thlah le video a tar ah Pathian kong a chim lengmang i a dingfel ngaimi ah ka ruah caah ka zumh. Kan tangka vialte cu Pathian kong a chim pengmi le kan zumhmi nu nih aa lak dih ko,” tiah lungrawk ngai in a chim.
A caw vemi Laimi 3 nih, “Levi Sap Nei Thang cu tangka kan khirh kan ti,” tiah an chim. Nu pakhat nih, “Kei cu aa ka khirh dih ko,” tiah a chim. Pa pakhat nih, “Kei cu tlawmpal lawng aa ka khirh,” ati. Adang pakhat cu a khirh duh lo.
Levi Sap Nei Thang le a sihni cu Reuters media nih an hrokhrawlnak kong biahal dingin an chawnh hna nain an let duh hna lo.
March 8 ah Levi Sap Nei Thang nih a website ah cathanh a chuah i “Zinaan le gas cawhnak nawl aa ka cawmi paoh cu anmah lungtho tein an ka cawkmi asi ko. Ka duhmi minung sin paoh ah zuarnak nawl ka ngei, ka duh tik paoh ah zuarnak nawl ka ngei, ka duh zat paoh in a man ka hauh khawh,” tiin aa hrocer.
![](https://thechinexpress.com/wp-content/uploads/2021/03/Screenshot-2021-03-23-at-7.41.49-PM-1024x945.jpg)
![](https://thechinexpress.com/wp-content/uploads/2021/03/Screenshot-2021-03-23-at-7.42.16-PM-1024x520.jpg)
Zinaan le gas chawlehnak company tumtlang taktak a simi Western Energy Alliance an President Kathleen Sgamma nih cun, “Levi Sap Nei Thang thil tuah hi aa ningcang lo, cucaah US citizen zong asi fawn lo i a cawkmi vialte hi President Biden acozah nih a chuh/ting dih awk si. Hi thil diklo hi cu remh a fawite ko, cozah nih a chuh/ting dih ahcun a dih ko,” tiah a chim.
Levi Sap Nei Thang cu Green Card (PR) lawng asi.
Levi Sap Nei Thang nih “Keimah Bantukin Nan Rum Lai” tiin a hlen hna
Tha Cin nih, “Na rian ngol cang, sushi business tuah ti hlah. New Mexico ah ra law mah vawlei hin zinaan na cawh lai i ni fatin zinaan pung 3,000 in 4,000 peng na hmuh lai aa ka ti.
“Keimah bantukin na rum lai i vawlei cung ramkip na tlawng kho lai, mission rian hna kan ṭuanṭi te lai aa ka ti,” tiah a chim.
Ka lunghring
“September thla ah New Mexico ah zinaan le gas cawhnak ding vawlei cu ka va zoh. Levi Sap Nei Thang a chungkhat nih aa ka zulh i bia ka halmi pakhat hmanh aa ka leh khawh lo caah ka lunghring pah cang.
“Hnu ah ka hlat tikah mah hmun 2 ningin $200,000 lawng in a cawkmi si ti ka hngalh,” tiah Tha Cin nih a chimchap.
Michigan state ah a ummi Andrew Sang le a hawi pakhat zong Tha Cin bantukin hlen an tong ve.
“Levi Sap Nei Thang nih Facebook ah live a thlahmi le video a tarmi kan hmuh caah $47,000 in Wyoming state um zinaan le gas cawhnak hmun cu amah sinah kan cawk ve,” tiah an chim. Mah thla ah Levi Sap Nei Thang nih $12,000 lawng in a cawkmi si.
Wyoming cu zinaan le gas boruak a chiat tuk caah zinaan le gas company tumtlang pawl nih an zaamtak (chuah takmi) asi. Levi Sap Nei Thang nih ‘a hlawk tuk e cu e kha e’ tiin Laimi a hlen hna i thla thok ah $12,000 in a cawkmi cu thla dongh lai ah $47,000 bakin a zuarh hna.
Wyoming state cozah record kan zoh tikah mahka hmun i zinaan le gas cawhnak nawl cu Levi Sap Nei Thang nih a pe hna lo. A ngeitu (owner) ah Levi Sap Nei Thang asi peng rih ko. A mak ko.
Andrew Sang nih, “Levi Sap Nei Thang nih ahmun zoh dingin Wyoming state ah a kan auh lio ah, 2021 ah company tumtlang pawl nih mah vawlei ahhin zinaan le gas cawh dingin an in ton te hna lai a kan ti. A chim daan ahcun 2021 ah millionaire asi ding phun khi kan lo.
“Mah ruangah, Michigan state zongah ekah 80 kau hmunhma cu Levi Sap Nei Thang sinah $5,000 in ka cawk chap. Levi Sap Nei Thang nih cun ‘laksawng ai ah $5,000 in kan pek’ aa ka ti,” tiah a chim.
Mah cu September thla ah Levi Sap Nei Thang nih $450 lawng in a cawkmi asi, tiah cozah record ah kan hmuh.
Andrew Sang nih, “Levi Sap Nei Thang cu ngol loin ka cawh chih peng hnu ah $4,900 aa ka khirh, a taangmi $100 cu aa ka khirh duh lo.
“Wyoming state ah $47,000 in kan cawkmi cu atutiang fang 1 hmanh a kan khirh duh lo,” tiah a chim.
Hi kongah thil diklo 2 ummi cu;
- Laimi caah zeihmanh a si lomi kha ‘a hlawk tuk, nan i rumnak lai’ tiin a hlen hna i tangka tampi in a zuarh hna. Zei he dah aa lawh ti ahcun, $3 man ‘sui ṭhi deu (fake gold necklace)’ kha ‘sui ṭhi taktak (real gold necklace)’ asi tiin Laimi hlen i $5,000 in zuarh bantuk asi.
- Pakhatnak bantukin a hlen hna hnu ah Laimi nih an i zumh i tangka cu an pek nain a zuarhmi hna thil cu a pe hna lo. Sungh 2 tiang a sunghter hna, voi 2 tiang a hlen hna kan ti lai cu.
Levi Sap Nei Thang nih zinaan le gas cawhnak nawl a ngeihmi hmun tampi a taang rih i mi tampi a zuarh rih hna lai tinak asi.
A hlenmi lakah nai tel ve maw? Midang hlen an tonnak hnga lo mipi ralrin peknak ah thil sining langhter na duh ahcun The Chin Express email lian@thechinexpress.com ah pehtlaih khawh kan si. Kan Facebook page zongah cakuat khawh kan si.