Tuni November 4, mah ca kan ṭial lio Kawlram caan 7:27pm tiangah Chin ramkulh hmunn 3 ah kahdohnak a chuak i CDF nih Kawl Ralkap 5 an thah hna, tiah kan theih.
Tu zingka 8am in 11am tiang suimilaam 3 chung Kanpetlet peng, Kyindway khua um ralhrang Kawl Ralkap le CDF-Kanpetlet kar ah fak ngai in kahdohnak a chuak.
“Ralhrang Kawl Ralkap 5 kan thah hna pinah a dang tampi kan hliam hna caah Kawl Ralkap pawl cu hnulei ah an zaam,” tiah CDF-Kanpetlet nih a thanh.
“Kanmah CDF-Kanpetlet lei cu hliam tongmi le thimi um lo tein hlawh tling tein kan kir kho.
“Kyindway khua ah ummi ralhrang Kawl Ralkap pawl cu CDF-Kanpetlet kan umnak sang ah motorcycle in an rat caah kan i kah hi asi.
Mindat peng hmun 2 ah kahdohnak a chuak
Tu zingka 8:30am hrawngah Mindat peng, Mindat – Matupi lam hmun 2 ah CDF-Mindat le ralhrang Kawl Ralkap an i kap.
Mindat – Matupi lam meng tung 6 le 9 pawngah an i kap, i Kawl Ralkap nih miakpi in voi tampi an kah hna.
Mah hnu ah, Matupi in Mindat lei ah tank 2 le motor tampi in a rami Kawl Ralkap pawl cu meng tung 43 pawngah 2pm hrawngah CDF-Mindat nih hnulei he hmailei he cengceh ceh bantukin an kah hna.
Nizaan ah CDF-Mindat nih Kawl Ralkap 10 an thah hna, CDF-Mindat kum upa bik 1 nih Chin miphun le ram caah a nunnak pek
Nizaan zingka ah Matupi in Mindat lei ah tank 2 le motor 75 in a rami ralhrang Kawl Ralkap pawl cu CDF-Mindat nih lam tantim ah an kah hna i 10 an thah hna.
“Ralhrang 10 kan thah hna pinah adang tampi kan hliam chih hna,” tiah CDF-Mindat nih a chim.
“Kanmah CDF-Mindat ralkap 3 hliam kan tong ve. Pakhat cu a hma fah tuk caah ralram ah a nunnak liam.
“Ralram ah a nunnak liammi hi kum 73 asi cangmi le pension a la cangmi sianginn cachim/saya asi. CDF-Mindat nih kan upat i kan i bochanmi asi,” ati.
