Tuni ah Myanmar ram chungah ralkap duhlo langhter in sandahpiahmi mipawl cu ralkap le palek nih meithal in an kah hna i minung 9 leng an thi.
Thawngla tampi zong an tlaih hna.
February 1, 2021 ah ralkap nih Pi Suu le ram hruaitu pawl a tlaih hna i uknak a lak hnu in nifatin ramchung ah mipi sandah an piah peng.
Cucaah, Min Aung Hlaing telhin ralkap bawi pawl cu nitlak lei ram pawl nih atu leklek phihkhamnak an tuah hna.
British cozah nih Ningani ah Myanmar kong UN Secuirty Council meeting kan tuah lai a ti.
Mandalay, Monywa, Myingyan le Yangon ah sandahpiahmi mipi pawl cu ralkap le palek nih meithal in an kah hna caah minung 9 leng an thi. Hliam tongmi an tampi.
“Mandalay ah pakhat cu a lu ah an kah, pakhat cu a ttang ah an kah,” tiah min langhter lomi sibawi pa nih a chim.
Monywa lawng hmanh ah a thimi pa 4 le nu 2 an si. Yangon, North Okkalapa Township ah kum 19 pate zong a lu ah meithal kuan nih a khen caah a nunnak liam.
“Ralkap le palek pawl nih sandahpiahmi pawl cu tear gas, rubber bullet le meithal kuan taktak in an kah hna. Hliam tongmi zong an tampi,” tiah zaanghlei cawi hliam tong zohkhenhtu nih an chim.
Myingyan khua ah Zin Ko Ko Zaw, kum 20 cu a lu ah meithal in an kah caah a nunnak liam. Minung 17 leng hliam an tong. – 7Day News Journal
