March 25 zaanlei sml 2:00pm leng hrawng ah Hakha mipi pawl cu ralkap duhlo langhter in lam an zawh lio ah palek le ralkap nih rubber (khaihriat) meithal kuan in an kah hna.
Cun, minung 10 hrawng an tlaih hna. Nu pakhat aa tel tiah kan theih.
“Mi tlaihnak motor cung an khinmi ah nu pakhat zong ka hmuh. Tarpa pakhat zong ka hmuh. Tarpa cu lam a kal lio ah an tlaihmi a si.
“Keimah ka ruahnak ahcun mi tlaihnak motor chung ah minung 10 hrawng an um lai,” tiah mithmutu pakhat nih a chim.
Palek le ralkap nih an tlaih mi hna lakah kum 70 deng a si mi Pu Kam Lo zong aa tel tiah zumh a si.
An tlaihmi hna lakah khaihriat meithal kuan nih a khenmi pakhat zong aa tel.
Palek le ralkap nih khaihriat meithal kuan in an kah hna lio ah mipi cu an i tthek dih. Pakhat cu a ke ah an khen i a hma zong a fak ngai an ti.
Atu hi Hakha Dawrthar, Mohein/Mercy lakphak dawr hmai hrawng ah Ralkap le Palek an um cang. A si khawh ahcun mino cu leng chuah lo ah a tha. A bik in zuu ri mi cu chuah lo ah a tha.
March 24 zongah tlaihmi 10 hrawng an um i tuni tlaihmi he cun an zate minung 20 hrawng an si. An tlaihmi hna lakah University siangngakchia pawl an i tel. – Chin World
