Tuni January 7 ah Malaysia ah Covid-19 mizaw thar 3,027 an hmuhchap hna. Nikhat te ah hi tluk in mizaw thar hmuhmi an tam bal rih lo.
Ngandamnak Vuanci Zung director-general Dr Noor Hisham Abdullah nih, “Liamcia suimilam 24 chungah Covid-19 in a dam i sizung in chuahtermi 2,145 an si. Nihin tiang a dam cangmi 102,723 an si cang,” tiah tu zaanlei ah a chim.
Cun, Covid-19 in a thimi tharmi 8 an um. A thimi dihlak 521 an si cang.
2020, January thla ahkhan Malaysia ram ah Covid-19 zawtnak hmasabik an hmuh si i nihin tiang zawtnak ngei hmuhmi dihlak 128,465 an si cang.
Atu lio sizung pawl ah Covid-19 in a zaw cuahmah mi 25,221 an si. Mizaw zualh zohkhenhnak khan (ICU) ah 142 an um i 63 cu cuap thli luhchuahternak seh bunh an si.
Tuni Covid-19 mizaw thar hmuhmi lakah 6 lawng hi zawtnak ngei cia in ramdang in a rungtlungmi an si.
A tangmi pawl cu ramchung ah zawtnak aa chawnmi an si hna.
Tuni mizaw thar hmuhmi lak ah Johor state in an tambik, 1,103 an si.
Pahnihnak ah Selangor (706 cases), Sabah (493 cases) le Kuala Lumpur (316 cases) hna an si.
