Malaysia, Kawlram le India um Laimi zaraan nih cun kan thei tuk men lai lo nain, US le nitlaklei ram um Lai mino tampi cu Bitcoin, Dogecoin, Ether, tbk online tangka (cryptocurrency) ah an buai ngai hna.
US Laimi zong hi Bitcoin, Ether, Dogecoin, tbk stock a cawmi an tampi ve lai tiah kan zumh.
UK cozah bank ‘Bank of England’ lutlai Pu Andrew Bailey (hmanthlak) nih, “Cryptocurrency ah invest a tuahmi paoh cu an tangka sungh dih dingin timhcia an si a herh,” tiah media sinah thawngthanhnak a tuah.
“Cryptocurrency pawl cu an fek lo. Cucaah fianghlang tein ka chim ṭhan rih lai, ka sungh dih zongah apoi lo nan ti lawngah caw uh,” ati.
US cozah bank ‘Federal Reserve’ zong nih July thla ahkhan “Cryptocurrency pawl hi an man tlak le kai a fawi tuk caah invest a tuahmi pawl tangka tamtuk an sung kho,” tiin report a rak chuah.
Cryptocurrency (online tangka) cu cozah nih a cohlang lo i bank ah hman khawh asi lo. Cozah system ah hman asi lo caah Bitcoin, Ether, tbk cryptocurrency aa kuami cu cozah nih a kuatu le kuatmi minung zong a hngal kho hna lo.
Mah ruangah misual, mifir le hacker pawl nih an hman duh ngaingai. Mah pinah, US le nitlaklei ram mipi cu privacy an uar tuk (cozah le mipi theih loin zalong tein cawlcangh an uar tuk) caah cozah le bank nih nehnang dawi khawh lomi online tangka hi an uar tuk.
Online tangka a uarmi tampi nih cun, “Hmailei ahcun nehnang dawi khawh lomi online tangka hi mipi nih hman cio asi te lai,” an ti lengmang.
Cucaah online tangka Bitcoin, Ether, Dogecoin, tbk pawl cu ni kum 2020 in atutiang hi khuaruahhar bakin an lar i an man vantawng in kai. A lar bikmi Bitcoin lebang cu mah ca kan ṭial lio ahhin $52,890 asi.
Nain, a caan ahcun ni 1 chungah $10,000 te hna an man ṭum/tla. Bitcoin cu 2017 ahkhan a rak kai tuk i $20,000 a phan te lai an rak ti nain a hmai kum 2018 ahcun $3,122 bakah a tla.
Atu ah $52,000 leng a simi zongah hi ruah lo piin niam taktak ah a tla te khomi si caah atu ah a cawmi cu sungh cikcek in an sung te kho, ti hi UK Cozah Bank lutlai telh in minung tampi nih mipi ralrin peknak bia an chim lengmang.
Tangka tampi hloh awk a ngei lomi le ngeih chun tein invest a tuahmi zapi zaraan caah cun sungh a fawi tuk, tihnung tuk (tangka thap in phe kah bantuk asi). Mirum tumtlang pawl cu phaisa hman ding tampi an ngeih caah, a man tlak caan zongah chuah loin a kai ṭhan tiang a kumkum zong an hngah khawh caah annih caah cun ṭihnung tuk lo. An sungh dih zongah tangka dang tampi an ngeih rih caah a hnorsuang tuk hna lo.
Mah ruangah mi tampi nih cun “Online tangka (cryptocurrency) ahcun na ngeihchunmi dihlak invest hlah, hi cu ka sungh dih zongah aa ka hnorsuang lai lo, ka sungh dih zongah apoi lo na timi zat lawng invest…” an ti lengmang nak hi asi.
