Myanmar ralkap nih Chin state ah nan tuahmi pawl hi UK cozah nih ṭha tein kan in ngiat peng ko hna, nan thil tuahmi vialte cazin kan khawmh dih lai, a rannak in ngol uh, tiah UK cozah nih Kawl Ralkap ralrin a pek.
Myanmar ralkap nih Falam le Hakha kar um Rialti khua inn vialte an khangh dih. Baptist biakinn zong an khangh. Thlanrawn khua zongah inn 10 leng an khangh cang. Falam peng mipi 3 an kah hna i 2 an thi. Lungpi khua zongah inn an baoh i facang, chiti, cite, tbk le innzuat saṭhil an firpiak dih hna. Mah hnu ah atu bantukin UK cozah nih Kawl Ralkap ralrin a pek hi si.
Yangon um UK Tanzung nih, “Chin state le Sagaing region ah Myanmar ralkap nih thazaang na chapmi le ral na tukmi thawngpang pawl hi UK cozah nih naih tein kan ngiat peng ko.
“Myanmar ralkap nih kahdohnak ngan nan thok ahcun khuami vialte, an khuasaktintuknak vialte, an thilri vialte le biakinn vialte harnak nan pek dih hna lai tiah kan thinphang.
“Hika hmun ummi milu tlawm biaknak pawl hrimhrim hi harnak fak tuk an tong kho ti kan hngalh.
“Cucaah, sualnak nan tuahmi vialte ṭha tein cazin khawmh dih dingin ralkap uk lomi zatlang bu pawl he naihniam tein kan ṭuanṭi peng lai.
“Myanmar ralkap nih raltuknak ngan nan tuah cangmi pawl zoh tikah, mipi zawnruahnak a pelte hmanh nan ngeih lomi hmuh khawh asi.
“Myanmar ralkap nih a rannak in raltuk na ngol le ramkip upadi na zulh hrimhrim a herh,” ati.
Chinland Defense Force (CDF) nih UK cozah cathanh cu aa share i, “Ralhrang SAC ralkap nih sualnak an tuahmi pawl hi ramdang zong nih UK ram bantukin kan zohfel piak cio dingin kan in nawl hna,” ati.
