UN Secretary-General Antonio Guterres nih “ralkap nih uknak an chuhmi hi rawhter hrimhrim dingin ka tuah khawhmi paoh ka tuah dih lai,” tiah a chim.
“Myanmar ralkap nih uknak an chuhmi hi rawhter hrimhrim dingin ramdang cozah le rianṭuantu vialte kan si khawh chungin kan forhfial hna lai.
“Ningcang tein thimnak an tuahmi phichuak le Myanmar mipi duhnak hrawh cu kan cohlang kho hrimhrim lo.
“Myanmar ram ah democracy leng kho ṭhan seh ti ka duh, cucaah an tlaihmi vialte an thlah dih hna a herh,” ati.
UN Security Council nih Myanmar ralkap uknak chuhmi lungtlinlonak cathanh chuah dingin poipang meeting a tuah nain China le Russia nih an duh lo caah a chuah kho lo.
Myanmar ralkap a bawmtu China le Russia cu UN Security Council member ram 15 lakah aa tel vemi an si pinah bia khiahmi leetnak nawl (veto power) a ngeimi zong an si caah anmah lungtlin lo cun UN Security Council nih zeihmanh a tuah kho lo.
Member ram 13 nih China le Russia cu an leem cuahmah hna lio asi rih.
